Read cisena YOBU 4 Bible Online

YOBU 4 - cisena bible

YOBU 4

¹Tenepo Elifazi wa Chitemani adatawira mbati,

²“Ayi Yobu, unaswirizwa napyo ngakhala ine ndinalongapo? Apo mbani anakwanisa khala kwene mulomo phoo?

³Nyerezera mule mudafunzisira iwe anthu azinji, pontho mule mudawangisira iwe manja akusowa mphamvu.

⁴Ngakhala unango adagwegweduka, penu alebwedeka manungo, mafalako akhamuwangisa mtima mbaimira.

⁵Kwache lero ndiwembo ukuona nyatwa, pontho iwe waswirizwa napyo mbutayiratu mtima.

⁶Iwe udapembedza Mulungu, pontho moyo wako ukhali nkhabe chinthu chakupokanyisa; apo iwe hudatheme tayu kukhala na chidikhiro pontho chikhulupiro?

⁷“Nyerezera pya penepi: mbani munthu okhonda dawa adatoma kuona nyatwa ninga tenepa? Nkhupi munthu wakulungama adatoma kuvungika ninga tenepa?

⁸Ine ndaona kuti anthu ale ambabzala pyakuipa, pontho kufesa umambala, ambavunambo pyonthopyo.

⁹Ninga chonzi Mulungu adamala kuatswaira onsenewo; na ukali wache iwo adamala vungika.

¹⁰Anyakudawa ambabangula ninga nkhalamu, kwache Mulungu ambaamatamisa mbaakhutcha mano.

¹¹Ninga nkhalamu yakusowa nyama, iwo ambafa, pontho anawo ambamala balalika.

¹²“Nsiku inango mphangwa zidadza kuna ine chibiso-biso, mwachiwere-were pyakwanga mwakuti ine sidazivesese tayu.

¹³Ine ndikhasanyika na ndoto zakugoswa, ndzidzi ukhali anthu m'chitulo chakufa nacho,

¹⁴ine ndidaphatwa na mantha mbanditetemera; manungo anga onsene adagedemera.

¹⁵Kamphepo kanonono kadapepesa kunkhope kwanga, tenepo tsisi yanga yonsene idanyaula na mantha.

¹⁶Kamphepo kale kadaleka. Tenepo chinthu chinango chidaimira kutsogolo kwanga, mbwenye sidakwanise kuona mwadidi makhaliro ache; penepo ndidava fala yachiwere-were ikulonga kuti,

¹⁷‘Ayi munthumbo pyache ambafa ule anakwanisa kukhala wakulungama pamaso pa[4] Mulungu? Ayi iye anakwanisa kukhala wangwiro pamaso pa[5] Nyakumulenga?

¹⁸Ngakhala Mulungu nkhabe nyindira anyakumtumikira tayu, ngakhala ambagumana kuphophonyeka pakati pa angelo ache,

¹⁹apo nditani na munthu ule adasasanywa na dongo, ule adabulukira kufumbi wakuti anakwanisa kubwededzeka ninga uchenje?

²⁰Munthu anakwanisa kukhala na moyo machibese, na mawulo mwache mbafa; iye nkhabe dziwa tayu kuti atayika kwenda na kwenda.

²¹Khumbi yache yamala fudzwa; iye ambafa wakusowa nzeru.’ ”