Read cisena YOBU 40 Bible Online

YOBU 40 - cisena bible

YOBU 40

¹Tenepo MBUYA adalonga kuna Yobu mbati,

²“Ayi Yobu iwe ukufuna kuchita mphoka na Nyamphamvu zonsene? Apo iwe, nyakufuna kuketesana na Mulungu, tawiratu.”

³Tenepo Yobu adatawira MBUYA mbati,

⁴“Ine sidatheme tayu; ndinakutawirani tani? Ine ndinaphopha pyanga mulomo.

⁵Ndalonga kale pinthu pizinji kupiringana pyathema ine kulonga, natenepo ine nkhabeve chakulonga tayu.”

⁶Tenepo kubulukira m'chivumbulu, MBUYA adalonga pontho kuna Yobu mbati,

⁷“Imira dzololo ngakhala ndiwedi mamuna mbunditawire mivunzo yangayi.

⁸Ayi iwe ukufuna kundionesa ninga nyakusowa chilungamo? Kundiyesa wakudawa iwe mbukhala wakulungama?

⁹Ayi iwe una mphamvu ninga za Mulungu? Falako inakwanisa kudima ninga ya Mulungu?

¹⁰Ngakhala pili tenepo imira kupilemedza wekha ene pontho utumbame; pivazike wekha ene na pinthu pyachifumu pontho na demelero.

¹¹Na kuzhangali pontho ukali wako, ngayang'ana anthu anatumbamawo mbuachepese.

¹²Ande, ngaayang'ane anyakutumbama onsenewa mbuatchithise pansi; pondedza anyakudawika ponsene panaimira iwo.

¹³Onsene afikhire pansi, pontho uaponye m'perezo kudziko ya anyakufa.

¹⁴Tenepo ine ndinakhala wakutoma kukusimba, mbindilonga kuti na mkono wako wapipulumusa wekha ene.

¹⁵“Ngayang'ana nyangume Behemoti,[38] nyama ikulu, Ndidamulenga ndine mbindilenga pontho iwe. Iye ambadya maudzu ninga ng'ombe.

¹⁶Iye ngwamphamvu pikulu pene, manungo ache ngakuwanga.

¹⁷Mchirache umbaimira tchii ninga muti wamkungudza, pontho nyama za m'miyendo mwache nsakuphatana.

¹⁸Magogodo ache ngakuwanga ninga nkuwa, pontho miyendo yache akhala ninga mitandaliko yasimbi.

¹⁹“Pachinthu chakudodomesa chonsene chidalenga ine, weneyumbo ndiye koto, kwache ndi nyakumulenga ene basi ule anakwanisa kumkunda.

²⁰Maudzu akuti iye akwanisa kudya ambamera m'mapiri, kule kumbasenzeka nyama zam'tsanga.

²¹Iye ambagona tumba pansi pa mathundudzi a minga, mbabisala pakati pa mabande.

²²Mathundudzi a mingayo ambampasa mthunzi, pontho mikotamu m'khundu-khundu mwa mkulo imbamphimbira.

²³Iye nkhabe chita mantha na kukukuma kwa mkulo; iye ambakhala pyache fule m'madzi a mu Yorodani angakapiza kunkhope kwache.

²⁴Mbani anakwanisa kumdozola maso ache mbamphata, penu kumkwesha mphuno yache na chimedzo.