Read cisena YOBU 41 Bible Online

YOBU 41 - cisena bible

YOBU 41

¹“Ayi iwe unakwanisa kumedza Leviatani na chimedzo penu kumanga lulume yache na nkhambala?

²Ayi iwe unakwanisa kupitisa nkhambala na mphuno mwache, penu kumkoloweka nsabwada zache na chimedzo.

³Ayi iye anathimiza kukupempha kuti umsudzule, penu kulonga nawe na mafala adidi?

⁴Ayi iye anakwanisa kuchita chiverano na iwe, mbadumbira kuti anakutumikira kwenda na kwenda?

⁵Ayi iwe unakwanisa kusenzeka naye ninga mbalame, penu kummangirira na nkhambala kuti atsikanako asenzeke naye?

⁶Ayi anyamalonda anamzengeza? Apombo iwo anamgwanda-gwanda kumgulisa?

⁷Ayi unakwanisa kulasa khandache na dipa, penu kuphola msolo na momba.

⁸Yesera kwene kumphata kabodzi; iwe unabasikiratu, pontho nkhabe dzaduwalira nthonga yeneyo tayu.

⁹“Munthu onsene angaona nyama yeneyi, kuwanga mtima kwache kumbamala mbagwa pansi.

¹⁰Iye angazhangali ambachitisa mantha mwakuti nkhabe munthu ambawanga mtima kuimisana naye tayu.

¹¹Mbani anakwanisa kumsosa mbakhala na moyo? Nkhabe na mbodzi ene m'dziko yonsene ya pansi anakwanisa kuchita tenepo.

¹²“Leka ndikupange pya miyendo yache, pontho ndilonge pyakukula kwachita iye na mphamvu zache.

¹³Nkhabe anakwanisa kusuwa chikhanda chache, penu kulasa khandache thangwi ya ntchindu yache.

¹⁴Mbani anakwanisa kukanula kukanwa kwache, thangwi ya mano ache akugoswa?

¹⁵Kunduli[39] kwache kudasasanywa na mizere ya pyakugedera matswimo, pyakulukwa pabodzi pene pontho pyakuwanga ninga mwala.

¹⁶Phaphi yonsene yaphatanizwa mwa mphamvu kuna inzache, mwakuti muya nkhabe buluka na mwakuphatanizira mule tayu.

¹⁷Onsene amangiswa pabodzi pene mwakuti nkhabe chinthu na chibodzi chene chinakwanisa kualekanisa tayu.

¹⁸Iye angaotsira ntchasi zimbachetuma, pontho maso ache ambagaka ninga kubuluka kwa dzuwa.

¹⁹Malulume a moto ambayerima m'kanwa mwache, pontho mumbabuluka ntchasi.

²⁰Utsi umbabuluka na m'mphuno mwache ninga utsi wa maudzu akugaka pansi pa chikalango.

²¹Kupuma kwache kumbagasa makala a moto, malulume a moto ambabuluka m'kanwa mwache.

²²Khosi yache njamphamvu pyakwanga mwakuti onsene ambagumanikana na iye ambachita mantha.

²³Nyamache njamphanda, yonsene njakuphatana pyadidi pene pontho yokhonda tekenyeka.

²⁴Chiditi chache ntchakuwanga ninga mwala, ntchakuwanga ninga libwe.

²⁵Iye angatichita khakhaphathu, podi na anyamphamvu ene[40] ambachita mantha; iwo ambathawa thangwi ya shungu yache.

²⁶Nkhabe talasada, ile inakwanisa kumkoloza; nee dipa, tswimo penu momba pinakwanisa kumjobola tayu.

²⁷Kuna iye simbi imbakhala ninga phesi, pontho nkuwa umbakhala ninga nkhuni yakutchokoya.

²⁸Nkhabe tswimo inakwanisa kumchitisa kuthawa; kumponyera miyala na mbemba kumbakhala ninga kumponyera masundu-sundu.

²⁹Kuna iye chigomba chimbakhala ninga phesi; iye ambaseka ngakhala munthu anamponyera momba.

³⁰Mabade akumimba kwache ambakhala ninga madzinga; pinakambadza iye ambanyandula mataka.

³¹Iye ambachitisa nyanza kupeluka ninga madzi pamoto, kukuvula kumbachita iye m'madzi kumbaoneka ninga kuvungazwa kwa mafuta.

³²Iye ambachitisa mabimbi kuyetimira m'nduli mwache angafamba, mbasanduza nyanza kukhala na mapovu akuchena.

³³Nkhabe pontho chinango chakukhala ninga iye, iye ndi chinthu chakulengwa chile nkhabe mantha tayu.

³⁴Iye ambalulupisa nyama zakutumbama makazo; iye ndi mfumu wa nyama zikulu-zikulu zam'tsanga.”