Read cisena YOBU 42 Bible Online

YOBU 42 - cisena bible

YOBU 42

¹Penepo Yobu adatawira MBUYA mbati,

²“Ndikupidziwa MBUYA kuti munakwanisa kuchita pyonsene pinafuna imwe, nkhabe munthu anakwanisa kukukhondesani tayu chinthu na chibodzi chene chinanyerezera imwe.

³Imwe mwandivunza kuti, ‘Ndiwe ani iwe kuti udzudzumise uphungu wanga, munthu ene pyache okhonda dziwa pinthu.’ Ndidalonga pinthu pyakuti ine nkhabe kupivesa tayu, pinthu pyakudodomesa kuna ine mwakuti ine nkhabe kupidziwa tayu.

⁴Imwe mudandipanga kuti ndivesere mwenemo imwe mukulonga, pontho kuti ndiyese kutawira mivunzo yanu.

⁵M'ndulimu chikhadziwa ine pya imwe ntchontho chikhandipanga anthu anango, mbwenye lero ndakuonani na maso anga.

⁶Natenepo ndikuchita manyadzo na pinthu pyalonga ine, pontho ndikupikhwaza fumbi na madotha kuonesa kutchunyuka kwanga.”

⁷Pidamala MBUYA kulonga na Yobu, adalongambo kuna Elifazi wa Chitemani mbati, “Ine ndazhangali pyakwanga nawe pabodzi pene na ashamwali ako awiriwa, thangwi nee mwalonga pyakuonadi pya ine tayu, ninga mwachitira nyabasanga Yobu.

⁸Chinchino kwatani ng'ombe zimuna zinomwe na mabira achimuna anomwe mbamupipereke kuna Yobu pontho mupereke nsembe zakupyerera thangwi ya imwe enechiro ache. Yobu anakupemphererani, tenepo ine ndinava kupemphera kwache, mbandileka kukuchitisani manyadzo malingana na pinthu pidachita imwe. Imwe hamudalonge pyakuonadi ninga mudachitira Yobu tayu.”

⁹Elifazi wa Chitemani, Bilidadi wa Chishuhi, na Zofari wa Chinaama adachita pinthu pidaapanga MBUYA; tenepo MBUYA adava kupemphera kwa Yobu.

¹⁰Pidamala Yobu kupempherera ashamwali ache atatu ale, MBUYA adachitisa pontho pinthu pya Yobu kufamba mwadidi mbakhala wakufuma pyakwanga kawiri kupiringana pakutoma.

¹¹Abale ache na anyamaingache pabodzi pene na ashamwali ache Yobu onsene akale adadza kuna iye dzachedza naye mbadya naye pabodzi pene phwando m'nyumba mwache. Iwo adamthondoza mbampepesa thangwi ya nyatwa zonsene zikhadamdzesera MBUYA. Munthu onsene wa iwo adamdzesera kobiri na mphete yagolidi.

¹²MBUYA adamtsanzayisa khundu yakumalisa ya moyo wa Yobu kupiringana kutsanzayiswa kudachitwa iye pakutoma. Yobu akhali na mabira pikwi khumi na pinayi, ngamila pikwi pitanthatu, na ng'ombe za pachingolo pikwi piwiri na mabulu chikwi chibodzi.

¹³Iye adabala ana anomwe achimuna na ana atatu achikazi.[41]

¹⁴Mwanache wamkazi wamkululetu adamthula Yemima, wachiwiriyi Kezia, wakumalizirayi adamthula Kereni-Hapuki.

¹⁵M'dziko yonsene pakhali nkhabe akazi akubalika ninga ana achikazi a Yobu tayu. Babawo adaagawaniza mfuma ile pabodzi pene na nkhoswe zawo kuti asale napyo.

¹⁶Pidamala penepi Yobu adakhala na moyo pyaka pinango dzana na makumanayi; iye adaona pidzukulu pyache mpakana mfendu wachinayi.

¹⁷Tenepo iye adafa wakukalamba pontho wa pyaka pizinji pyakubalwa.