Read cisena YOBU 5 Bible Online

YOBU 5 - cisena bible

YOBU 5

¹“Yobu, chemera ngakhala unaona unango wakukutawira? Ayi alipo mngelo unango kule kunakwanisa iwe zungunukirako?

²Thangwi kuzhangali kumbapha pupwe, pontho bivu imbavunga dzemwa.

³Na maso anga ndaona pupwe akumera mitsitsi, mbwenye vumbu-vumbu musache udatembererwa.

⁴Anache nkhabe mbuto yakupata tayu, iwo ambaponderezwa m'thando ya miseru mbasowa nyakuavunulira.

⁵Anthu a njala anadya phoso yache, podi na mapira ene akumera pakati pa ntcheswa, pontho anthu anyota anasirira mfumache.

⁶Kusanyika nkhabe kumera m'mataka, penu nyatwa kutumbuka kubulukira pansi tayu.

⁷Andedi! Munthu ambabalirwa kuona nyatwa, ninga mumbachitira ntchasi kuthothomuka pamoto.[6]

⁸“Ine mbidakhala ndiwepo mbidayang'ana kuna Mulungu, pontho mbidenda na mseru wanga kuna iye.

⁹Iye ambachita pyakudodomesa, pile ife nkhabe kupivesa tayu, pontho pyakudzudzumisa pyokhonda lengeseka.

¹⁰Iye ambavumbisa mvula padziko yapansi mbawazira minda.

¹¹Ande, ndi Mulungu ule ambakwiza anyakupichepesa mbapereka kukomerwa kuna anyakusintili.

¹²Iye ambapotoza manyerezero aumpheswe mbakwesha anyakuchenjera papinthu pinanyerezera iwo kupichita, towera apichimwane monsene mwene.

¹⁴Mdima umbaagwera na masikati; uku dzuwa ikuswa miti iwo ambamphamphasa-mphamphasa khala ninga mosiku.

¹⁵Mbwenye Mulungu ambapulumusa anyakutcherenga kuimfa; iye ambapulumusa anyakusowa kuna kuponderezwa.

¹⁶Iye ambapereka chidikhiro kuna anyakutcherenga; iye ambamatamisa anyakusowa chilungamo.

¹⁷“Nyakutsanzaya ngule Mulungu angamsumulula! Ungadawa leka khonda kutchunyuswa na Nyamphamvu zonsene.

¹⁸Mulungu ambamanga pironda pyachitisa iye; manjache ambakuwaza; manjache onthowo ambapolesa.

¹⁹Nyatwa zingakugwera katanthatu, iye anakupulumusa; podi zingakugwera kanomwe kene, iwe nkhabe kuwazika na pang'ono pene tayu.

²⁰Njala ingafika iye anakukoya na moyo, pontho pankhondo anakutchinjiriza towera uleke kufa.

²¹Mulungu anakutchinjiza kuna lulume yakupha, iye anakupulumusa kuvungika kungadza.

²²Pandzidzi wa pyakuzunguzika na njala iwe unaseka, pontho iwe nkhabe dzachita mantha na nyama zam'tsanga tayu.

²³Minda inafuna iwe dzalima nkhabe dzakhala na miyala tayu; nyama zam'tsanga nkhabe dzakugoswa tayu.

²⁴Iwe unadziwa kuti panakhala iwepo mphakupata; iwe unalengesa mabirako mbugumana kuti nkhabepo mbodzi akusowapo tayu.

²⁵Iwe unakhala na ana azinji, pontho pidzukulu pyako pinakhala ninga maudzu a padziko yapansi.

²⁶Ninga tirigu ule ambafika mpakana ndzidzi wakuvuna, iwembo unakhala na moyo mpakana unkhalambako.

²⁷Yobu, penepi ife tidapiona mwadidi pandzidzi ukulu ene, pontho mphyakuonadi, natenepo upione ninga pikulonga kuna iwe.”