Read cisena YOBU 6 Bible Online

YOBU 6 - cisena bible

YOBU 6

¹Tenepo Yobu adatawira mbati:

²“Nyatwa zanga mbazidapimwa, pontho kusanyika kwanga konsene mbakudaikhwa pamdida,

³ipyo mbapidalemera pyakwanga kupiringana tchetcha ya pagombe: ndi thangwi yache ndidathamanga na kulonga.

⁴Matswimo a Nyamphamvu zonsene andilasa, pontho nyongo yache yamala kwana-kwana m'manungo mwangamu. Pyakugoswa pya Mulungu pyandikutira kukhundu zonsene.

⁵“Ayi bulu ambalira angagwedula maudzu, penu ng'ombe kulira ingadya mpovu?

⁶Mbani ambakomerwa na kudya pyadampwa, penu kudya chakuchena cha dzayi chokha?

⁷Ine nkhabe maba na kudya ninga kweneko tayu; pyonsene pimbadya ine pimbandisikula kukhosi.

⁸“Apo thangwi yache ninji Mulungu nkhabe kundipasa chinthu chidampempha ine? Apo atani kuva kupemphera kwanga?

⁹Mbapidakhala pyadidi Mulungu mbadandipeya pyache; iye mbadandipha kwene pyache mbwenye!

¹⁰Penepo ine mbidakomerwa pyakwanga pene, podi ndive pyanga kupha kwa kufa nako tani. Ine sidakhonde matongero a Mulungu, Nyakuchena ule.

¹¹Ndina mphamvu zanji kuti ndithimize basi kukhala na moyo? Thangwi yache ninji kuti ndithimize basi kukhala na moyo, uku ine nkhabe chidikhiro?

¹²Kani ine ndine mwala? Ayi manungo anga ndi simbi?

¹³Ine nkhabe sala na mphamvu tayu kuti ndinakwanisa kupipulumusa ndekha ene tayu; nkhabeve kunango kunakwanisa ine kuzungunukira kuti ndiphedzwe tayu.

¹⁴“Munthu wakutaya mtima athema kukhala na ashamwali akunyindirika, gopesera chikhulupiro chache pana Nyamphamvu zonsene chinatayika.

¹⁵Kwache imwe ashamwali anga mwandinyengeza ninga mikulo ya madzi akuthamanga, ile imbauma pyawo mvula ingaleka kuvumba,

¹⁶mikulo ile yasanduka madzi akuphatana thangwi ya kutonthola, pontho yaphophwa na milu ya matalala.

¹⁷Mbwenye kunja kungapisa ipyo pimbamala nyunguluka, pontho m'khundu-khundu mwa mikulo mumbakhala nyimwa pontho mumbauma.

¹⁸Anyakupakira ngamila ambatayika thangwi ya kusaka madzi; iwo ambatsalakatika mbafera m'thando yatchetcha.

¹⁹Anyakupakira ngamila a ku Tema ambasaka-saka madzi, pontho anyamalonda a ku Sheba ambanyindira madzi enewa.

²⁰Iwo ambataya mtima thangwi ambadikhira kuti anagumana madzi; kwache pidafika iwo kweneko adaphata pakanwa thangwi pakhali kakata.

²¹Imwe kuna ine mwakhala ninga mikulo yeneyo; imwe mwaona kusanyika kwanga mbamubwerera m'nduli na mantha.

²²Ayi ndakupemphani ine kuti mundipase mitukwa, penu na mfumanu mudyekere kuna munthu unango m'mbuto mwanga?

²³Ayi ndakupemphani kuti mundipulumuse m'manja mwa anyamalwanga, penu kundiombola kuna anyakundiboneresa?

²⁴“Ndifunziseni, tenepo ine ndinati ndikhale mulomo phoo kukuveserani. Ndipangeni pyonsene pyachimwana ine.

²⁵Mafala akuona ambandiphata mtima. Apo pinandipokanya imwepi mphyanji?

²⁶Ngakhala imwe mukunyerezera kuti pinalonga inepi ndi mphepo ene pyayo; apo thangwi yache ninji mukutawira mafala a munthu wakutaya mtima?

²⁷Imwe mumbagwera juga ana masiye mbamugulisa ashamwali anu pamalonda akete-kete.

²⁸Yang'anani kunkhope kwanga. Ine nkhabe nama tayu.

²⁹Imwe mwapita kuchiwisi, lekani khala anthu akusowa chilungamo; lekani kundisumulula, ine ndachita pinthu pyakulungama.

³⁰Ayi imwe mukunyerezera kuti ine ndikunama? Ayi ine nkhabe kwanisa siyanisa pakati pa chadidi na chakuipa tayu?”