Read cisena YOBU 7 Bible Online

YOBU 7 - cisena bible

YOBU 7

¹“Moyo wa munthu padziko yapansi ngwakuphata basa mwakubulusa kaluma; nsiku zache zakhala ninga nyaganyo,

²ninga bitchu wakufuna mthunzi wa nonono kutonthola, pontho ninga nyaganyo wakudikhira kupagalwi.

³Mwezi na mwezi ine nkhabe kuona chinakhalira ine na moyo tayu; mosiku onsene kwanga nkhuona nyatwa kwene.

⁴Ndingati kwene seya ndimbalonga mumtima mwanga kuti, ‘Kunja kunaecha lini kuti ndilamuke?’ Ine ndimbafulukuta-fulukuta mosiku onsene mpakana makalakwecha.

⁵Manungo anga amala dzala na mfunye zokhokha; ana madazwi okhokha; mafinya akubuluka m'pironda pyanga.

⁶Nsiku zanga zikumala kwene wakusowa chidikhiro, zikuchita kuthamanga ninga mchere-chere wakuthunkira malitchera.

⁷“Kumbukani, Mulungu, moyo wanga wakhala ninga muya ene basi; kukomerwa kwanga kwamaliratu.

⁸Lero mwandiona, kwache mangwana nee munandionave tayu. Imwe munandisaka, kwache nkhabe dzandigumana tayu.

⁹Ninga mumbachitira makole kukungunuka na kumaliratu, sasawambo na nyakwenda kudziko ya anyakufa nkhabe bwerereko tayu.

¹⁰Iye nkhabe dzabwererave kumusa kwache tayu; iye ambaduwalika na anthu onsene ambamdziwa ale.

¹¹Nkhabe, ine nkhabe khala kwene mulomo phoo tayu! Ine ndazhangali pontho mtima ukundipha! Ine ndathema kulongapo pinthu basi.

¹²“Thangwi yache ninji mukuchita kundilondali? Kani mukunyerezera kuti ndine nyangume?[7]

¹³Ine ndagona pansi kuti mwinango ndipume. Ine ndikhasaka-saka kululupirwa kuna mtswotswo.

¹⁴Kwache imwe mudandithuswa na ndoto mbamundichitisa mantha na masomphenya.

¹⁵Mbapidakhala pyadidi kufa pyanga pakuchita kushipwa, kusiyana na kuva kupha m'manungo anga.

¹⁶Ndaimisa manja tchii; kukhala na moyo ndatopa nako. Ndisiyeni pyanga, thangwi moyo wanga nkhabeve basa tayu.

¹⁷“Munthu mbani kuti imwe mumtsalakane? Iye mbani kuti muiikhe konta pinthu pimbachita iye,

¹⁸pontho kuti mumsakanyule mwadidi machibese onsene mbamumuyesa ndzidzi onsene.

¹⁹Mwatani munakhonda ponya pyanu maso anu kukhundu, mbamundileka pyanga kuti ndikhudyule mata?

²⁰Ngakhala ine ndadawa, ine ndakuchitaninji, imwe nyakuyang'ana anthu? Mwandiphatisiranji basa ninga chinthu chakufunzirirapo ponta? Ayi ine ntchakunensa kuna imwe?

²¹Mwatani munakhonda kundilekerera pyakudawa pyanga penu kundibulusira umambalanga? Chinchino ndinati ndibwire fumbi. Imwe munandisaka-saka, kwache imwe nkhabe dzandigumana tayu.”