Read cisena YOBU 8 Bible Online

YOBU 8 - cisena bible

YOBU 8

¹Kubuluka penepo Bilidadi wa Chishuhi adatawira mbati:

²“Unaleka lini kulonga mafala ninga enewa? Mafalako ndi mphepo ene pyawo.

³Ayi Mulungu ambapotoza chilungamo? Ayi Nyamphamvu zonsene ambachimwana kuchita pinthu pyakulungama?

⁴Podi anako adamdawira, natenepo iye adaatchunyusa mwakuthemerana na kudawa kwawo.

⁵Kwache ngakhala iwe unayang'ana kuna Mulungu mbumdembetera Nyamphamvu zonsene,

⁶ngakhala iwe ndiwedi wangwiro pontho wakulungama, penepo Mulungu anabwera dzakuphedza, pontho anabwezera pyonsene pya m'nyumba mwako ninga mfupo wako.

⁷Mfuma yonsene idavungika ile inakhala ninga si pinthu tayu kusangiza na pinthu pinafuna kukupasa Mulungu.

⁸“Vunza mifendu yakale, unati ugumane pinthu pidagumanikana na makolo awo,

⁹thangwi ife tabalwa kwene dzulo-dzuloyi; ife nkhabe dziwa chinthu na chibodzi chene tayu, pontho nsiku zathu padziko yapansi pano zakhala ninga chigudu-gudu.

¹⁰Ayi iwo nkhabe kukufunzisa penu kukupanga pyakuchita tayu? Ayi iwo nkhabe longa pinthu tayu kubulukira kuna kuvesa kwawo pinthu?

¹¹Ayi chilulu chinakwanisa kumera pakusowa mtota? Ayi mtete unakwanisa kukula pakusowa madzi?

¹²Madzi angauma, iwo mbali atete, pontho okhonda gwandwa ambachimbiza kuunyala kupiringana pyakumera pinango pyonsene.

¹³Enewo ndiye mamalisiro ache a munthu onsene wakuduwalira Mulungu; chidikhiro cha munthu okhonda tsalakana pya Mulungu chinatayika.

¹⁴Chimbanyindira iye chinathumuka; thangwi chakhala ninga utandaude.

¹⁵Iye anatsamira nyumbache, kwache hinawanga tayu; iye anaiphatirira, kwache hinathimiza kukhalapo tayu.

¹⁶“Iye akhala ninga mbewu yakuthirirwa mwadidi ndzidzi wa dzuwa, mbitanthawira m'munda monsene.

¹⁷Mitsitsi yache imbakolekana-kolekana pakati pa miyala mbiyang'ana-yang'ana mbuto m'miyala.

¹⁸Mbwenye ungadulwa pambuto pache, nkhabe munthu na mbodzi ene anapidziwa kuti akhali penepo tayu.

¹⁹Ndimomwene kuti moyo wache umbaunyala; kubulukira m'mataka mbewu zinango zimbabalwa.

²⁰“Ndimomwene Mulungu nkhabe dzapasa nkhodolo munthu okhonda dawa tayu, penu kuphedza anyakuchita pyakuipa.

²¹Iye anakuchitisa kusekera, pontho milomo yako inakhuwa na kukomerwa.

²²Mbwenye anyamalwako anatota na manyadzo, pontho nyumba za anyakudawika nkhabe dzaonekave tayu.”