Read cisena YOBU 9 Bible Online

YOBU 9 - cisena bible

YOBU 9

¹Kubuluka penepo Yobu adatawira mbati:

²“Ande, ndikupidziwa kuti penepi mphyakuona. Apo munthu ene pyache ambafa ule, anakwanisa tani kukhala wakulungama pamaso pa Mulungu?

³Podi kwene kuti munthu apifune kuketesana na Mulungu, iye nkhabe kwanisa kutawira mvunzo na ubodzi ene tayu pamivunzo yache chikwi.

⁴Mulungu ngwanzeru pontho wamphamvu pyakwanga; nkhabe munthu anakwanisa kupokanyisana naye tayu mbakhonda kuwazika.

⁵Mwakututumusa iye ambafendedza mapiri, pontho na kuzhangali kwache iye ambaagubuduza-gubuduza.

⁶Mulungu ambatumiza piteke-teke mbatekenya dziko yapansi; iye ambasukhumisa mizati yakuphatisa dziko yapansi.

⁷Iye anakwanisa kuphata dzuwa kuti ileke buluka; iye ambaphimbira nyenyezi kuti zileke onesa cheza na mosiku.

⁸Mulungu yekha ndiye adasasanya kudzulu mbaponda pamsana pa nyangume.[8]

⁹Mulungu adalenga nyenyezi kuthambo, atsikana akugwa mago na mkazi mwezi, pontho mteme ndikutemembo na nyenyezi zakumwera.

¹⁰Ife nkhabe kwanisa kuvesa pinthu pikulu pimbachita iye tayu, pontho pyakudodomesa pimbachita iye nkhabe lengeseka tayu.

¹¹“Mulungu angagwanda, ine nkhabe kwanisa kumuona tayu; iye angafika chifupi na ine, ine nkhabe kwanisa kumdzindikira tayu.

¹²Iye ambagompha chinthu chinafuna iye, tenepo nkhabe munthu anakwanisa kumkhondesa tayu; nkhabe munthu ambawanga mtima tayu kumvunza kuti, ‘Chinachita imwe ninji?’

¹³Mulungu nkhabe dzabweza kuzhangali kwache tayu; iye ambapeyeratu anyamalwache, ale adaphedza nyangume Rahabi.[9]

¹⁴Kumtawira kwache ndinamtawira tani? Mafala akuti ndiketesane na Mulungu ndinaakwata kupi?

¹⁵Podi kwene kuti ine sidadawe tayu, ine nkhabe kwanisa kumtawira tayu; chinakwanisa ine kuchita nkhupempha kwene nsisi kuna Mulungu nyakunditonga mseru.

¹⁶Podi kwene kuti ndimchemere mbanditawira, ine nkhabe khulupira tayu kuti anandivesera pinafuna ine kulonga.

¹⁷Iye ambatumiza pana ine chonzi mbandipasa pironda wakusowa na thangwi ene.

¹⁸Iye nkhabe kufuna pyakundipumisa tayu; achitisa moyo wanga kukhala panyatwa.

¹⁹Ayi ndipichite mwakumkhakhamiza, apo ndi Mulungu mphapo? Ayi ndichite kumsumira, apo anafuna kampanga kwenda kumseruko mbani?

²⁰Ine sidadawe tayu, pontho ndine wakulungama. Mbwenye mafalanga akuveka ninga ine ndadawa, pontho pyonsene pinalonga ine pikundichitisa kukonwa.

²¹Ine sidadawe tayu, kwache ine nkhabe kupitsalakana ndekha ene tayu; moyo wanga nkhabeve basa tayu.

²²Kuna ine ntchibodzi-bodzi, ndi thangwi yache ndimbalonga kuti Mulungu anati atchunyuse anyakudawa na anyakukhonda dawa.

²³Munthu okhonda dawa angafa mwakututumusa, Mulungu ambaseka dzedze yache.

²⁴Mulungu adapereka dziko yapansi kuna anyakudawika, iye adachitisa atongi onsene kukhala maboli-boli. Ngakhala si Mulungu tayu achita penepi, apo mbani apichita?

²⁵“Nsiku zanga zikuthamanga kupiringana nyakuthamanga pabitcha-bitcha; izo zikumbuluka pyakwanga kuchimwana nsiku ibodzi enembo basi yadidi.

²⁶Moyo wanga ukugwanda kwene ninga mwadiya wakamtaye; wakuthamanga pyakwanga ninga mphamba wakugonkha mwanapiye.

²⁷Ine ndimbasekera kuyesa kuduwalira nyatwa zangazi, ndinasanduza nkhope yanga kusangizira kukomerwa.

²⁸Ine ndina mantha na nyatwa zonsene zinafuna kundigwera, ndikupidziwa kuti Mulungu akundiyesa basi ninga nyakudawa.

²⁹Podi ine ndayeswa kale nyakudawa, chinabonerera ine ninji pontho?

³⁰Podi ndisambe pyanga na mamina a mtondo, podi ndisambe pyanga manjanga na dotha,

³¹Mulungu ambandiponyera m'dzenje ya pyakunyansa, pontho na nguwo zanga zene zimbachitambo nane manyadzo.

³²Mulungu mbadakhala munthu, ine mbidamtawira, mbidenda naye kuthando ya miseru kuti tikaonane maso na maso.

³³Kwache nkhabe nyakukhala pakati pathupa tayu, nkhabe munthu wakutonga mseru pakati pa Mulungu na ine tayu.

³⁴Lekani kunditchunyusa Mulungu! Bulusani kugoswa kwanu!

³⁵Ine nkhabe chita naye mantha tayu, ndinati ndilonge thangwi mtimanga ndimbaudziwa.