Read cisena MASALIMO 10 Bible Online

MASALIMO 10 - cisena bible

MASALIMO 10

¹MBUYA munakhaliranji kutali? Apo mumbabisaliranji ndzidzi unakhala ife panyatwa?

²Anyakudawika, na kudungudza kwawo, ambaboneresa anyakutcherenga; akwesheni na misampha yateya iwoyo.

³Nyakudawika ambadungundza na pikhumbo pyache pyakuipa; iye ambatsanzayisa nyamtima mbakhonda MBUYA.

⁴Nyakudawika nkhabe tsalakana pya MBUYA tayu; iye na kudungudza kwacheko ambanyerezera kuti nkhabeko Mulungu.

⁵Pyonsene pimbachita nyakudawika pimbamfambira mwadidi. Iye nkhabe vesesa pya kutonga mseru kwa Mulungu tayu; iye ambasedegula anyamalwache.

⁶Iye ambalonga yekha ene mbati, “Ine nkhabeve dzatekeseka tayu. Ine nkhabeve dzaona nyatwa tayu.”

⁷Mafalache ngakudzala na pyakutemberera, pyakunama na pyakugoswa. M'kanwa mwache mumbabuluka mafala akufudza pontho akuipa.

⁸Iye ambabisala m'nkhwerekwete mwa midzi, kudikhirira anthu okhonda dawa kuti aaphe. Iye ambabisalira anyakusowa mphamvu;

⁹ninga nkhalamu mumsitu, iye ambabisalira m'mbuto yakubisika. Iye ambabwathama kudikhira anyakutcherenga; iye ambaakwesha na misampha yache mbaakwekweta kwenda nawo.

¹⁰Anyakusowa mphamvu ambapondedzwa; iwo ambagwa pansi pa mphamvu zache.

¹¹Nyakudawika ambalonga yekha ene mbati, “Mulungu nkhabe kupitsalakana tayu! Iye abisa nkhope yache, tenepo nkhabe kundiona tayu!”

¹²MBUYA atchunyuseni anthu akudawika! Anyakuona nyatwa akumbukeni.

¹³Ayi nyakudawika anakwanisa tani kululupisa Mulungu mbalonga yekha ene mbati, “Mulungu nkhabe dzanditchunyusa tayu?”

¹⁴Mbwenye imwe mumbaona; mumbadziwa nyatwa na kusanyika konsene, pontho ndzidzi onsene ndimwe wakusasanyika kuphedza. Nyakusowa mphamvu ambapipereka yekha ene kuna imwe, ndzidzi onsene imwe mumbaphedza anyakusowa babawo.

¹⁵Gobolani mikono ya nyakudawika na nyakuipa, atchunyuseni thangwi ya kudawa kwachita iwo, mpakana iwo abasikeletu.

¹⁶MBUYA ndi mfumu wakukhala na kukhala; madzinza anyakupembedza milungu anango anavungika m'dziko mwache.

¹⁷MBUYA, imwe munati muve kupempha kwa anyakubonereswa; munati muawangise mtima.

¹⁸Munati muve kulira kwa anyakubonereswa, pontho na ana masiye. Imwe munati mutonga mseru mwakuakomera, towera anthu apansi pano aleke dzathuswave.