Read cisena MASALIMO 102 Bible Online

MASALIMO 102 - cisena bible

MASALIMO 102

¹Kupemphera kwa munthu wakusanyika pyakwanga, ule akhuthula nyatwa zache zonsene pana MBUYA. Ivani kupemphera kwanga, MBUYA, pontho ivani chiliro changa kufuna chiphedzo!

²Ndingakhala panyatwa, lekani kundibisira nkhope yanu! Ndivesereni, pontho chimbizani kunditawira ndingakuchemerani.

³Moyo wanga ukumala ninga utsi; magogodo anga akugaka ninga moto.

⁴Mtimanga ukupondedzwa ninga maudzu akuuma pontho akuunyala; ine nkhabe chikhumbo chakufuna kudya tayu.

⁵Na thangwi ya kubulira mwakugaluza fala, ine ndachita sala kwene khanda na magogodo ene basi.

⁶Ndakhala ninga malezi m'thando yatchetcha, ninga dzidzi pamadembe.

⁷Ine nkhabe gona chitulo tayu, ndakhala ninga mbalame yakukhala yokha pansoyi ya nyumba.

⁸Nsiku yonsene anyamalwanga ambanditikana; anyakundiselusa ambaphatisa basa dzinanga kutemberera nayo.

⁹Na thangwi ya kuzhangali, pontho ukali wanu, kudya kwanga ndi dotha, pontho misozi yanga yavunganizikana na pyakumwa pyanga. Imwe mudandilokota mbamunditaya kunja.

¹¹Nsiku za moyo wanga zakhala ninga mthunzi wakumawulo; ine ndikuunyala ninga maudzu.

¹²Mbwenye imwe, MBUYA, ndimwe mfumu wakukhala na kukhala; mifendu yonsene inakukumbukani.

¹³Imwe munaonekera mbamuvera nsisi mzinda wa Zioni; thangwi ndzidzi wafika wakuti ndimvere nsisi; ndzidzi wakusankhulika wafika.

¹⁴Anyabasanu ambamfuna, podi kwene kuti iye avungika; iwo akumvera basi nsisi, podi kwene kuti iye asala madembe.

¹⁵Madzinza anagopa MBUYA; mafumu onsene a padziko yapansi anagopa demelero yache.

¹⁶MBUYA angamanga pontho mzinda wa Zioni, iye anaoneka na demelero yache.

¹⁷Iye anava kupemphera kwa anyakusowaletu pakuphata ale; iye nkhabe dzakhonda kuatawira tayu.

¹⁸Lembera mfendu unadzawo pinthu pyachita MBUYA, towera anthu adzati balwa ale amkuze.

¹⁹MBUYA adayang'ana pansi kubulukira pa mbuto yache yakuchena kudzulu, iye adayang'ana padziko yapansi kubulukira kudzulu.

²⁰Iye adava kubulira kwa anyaperezo mbasudzula anthu adatongwa kuti aphiwe ale.

²¹Natenepo dzinache inalalikwa mumzinda wa Zioni, pontho iye anakuzwa mumzinda wa Yerusalemu

²²madzinza na maufumu angadza pabodzi mbapembedza MBUYA.

²³Iye andichitisa kuti ndikhonde khala na mphamvu mwenemo ndili mphale; iye avilisa nsiku za moyo wanga.

²⁴Mulungu, lekani kundibulusa pansi pano mbandidzati kalamba. Ndimwe wakukhala na kukhala;

²⁵kale ene imwe mudalenga dziko yapansi, pontho na manjanu mudasasanya kudzulu.

²⁶Ipyo pinamala, mbwenye imwe munakhalapo; ipyo pinasakala ninga nguwo. Imwe munaakunundula ninga nguwo mbamaliratu.

²⁷Mbwenye imwe ndzidzi onsene nkhabe sanduka tayu, pontho moyo wanu nkhabeve mala tayu.

²⁸Anathu anakhala mwakuyang'anirwa mwadidi na imwe, pidzukulu pyawo pinakhala pyakukhazikika pamaso panu.