Read cisena MASALIMO 103 Bible Online

MASALIMO 103 - cisena bible

MASALIMO 103

¹Salimo ya Davite. Kuza MBUYA, moyo wanga! Mtimanga onsene kuza dzinache yakuchena!

²Kuza MBUYA, moyo wanga, pontho leka duwalira kukoma kwache mtima.

³Iye ambalekerera pyakudawa pyanga pyonsene mbawangisa utendanga onsene.

⁴Iye ambandiombola kuti ndileke pita m'masiye mbanditsanzayisa na kundifuna kwache kokhonda mala pontho na nsisi zache.

⁵Iye ambadzaza moyo wanga na pinthu pyadidi, towera ndithimize kukhala mphale, pontho wamphamvu ninga mphamba.

⁶MBUYA ambatonga miseru ya anyakubonereswa mwakuakomera mbaapasa ufulu wawo papinthu.

⁷Iye adatchululira Mose njira zache mbaonesa anthu a ku Israele mabasache amphamvu.

⁸MBUYA ngwansisi pontho wakukoma mtima, ngwakusowa chipsu, pontho wakudzala na kutifuna kokhonda mala.

⁹Iye ndzidzi onsene hanalongera anthu tayu, penu kukoya kuzhangali kwache kwenda na kwenda.

¹⁰Iye nkhabe kutitchunyusa mwakuthemerana na kudawa kwathu, penu tibwezera mwakuthemerana na umambalathu tayu.

¹¹Ninga kulapha kwachita kuthambo kubulukira pansi pano, ndi sasawambo na kuafuna kwache kokhonda mala pana ambamulemedza ale.

¹²Ninga kulapha kwachita kumabulukiro dzuwa kufikirana kumadokero dzuwa, pili tenepombo na kutibulusira kwache pyakudawa pyathu.

¹³Ninga baba ngwakuva nyambalo na anache, sasawambo MBUYA ngwakuva nyambalo na anthu ambamgopa ale.

¹⁴Iye ambadziwa mudasasanyirwa ife mule; iye ambakumbuka kuti ndife fumbi.

¹⁵Kuna ifembo, moyo wathu wakhala ninga maudzu. Timbakula na kuchita maluwa ninga pyakumera;

¹⁶tenepo pimbamenywa na mphepo, mbapimala, nkhabe na mbodzi ene ambapiona pontho tayu.

¹⁷Mbwenye kuna anyakulemedza MBUYA kuafuna kwache nkhokhonda mala, pontho udidi wache umbakhala ndzidzi onsene kuna mifendu

¹⁸ya ale ambakoya chiverano chache, pontho ale ambavera pifunziso pyache mwakukhulupirika.

¹⁹MBUYA adakhazikisa mpando wache wachifumu kudzulu; iye ndi mfumu padziko yonsene yapansi.

²⁰Kuzani MBUYA, imwe angelo onsene amphamvu, ambavesa matongero ache ale, ambavesera pinalonga iye ale.

²¹Kuzani MBUYA, imwe anyamphamvu monsene akudzulu, imwe anyabasache, anyakuchita pinafuna iye ale!

²²Kuzani MBUYA, imwe pyakulengwa pyache pyonsene kumbuto zonsene zimbatonga iye. Kuzani MBUYA, moyo wanga!