Read cisena MASALIMO 104 Bible Online

MASALIMO 104 - cisena bible

MASALIMO 104

¹Kuza MBUYA, moyo wanga! MBUYA Mulungu wanga, ndimwe wamkulu pyakwanga! Imwe mwavala demelero na ufumu;

²imwe mwapifinikiza mwekha ene na cheza ninga chakufinika. Imwe mudafuthula kudzulu ninga khumbi

³mbamuikha mitandaliko ya musanu pamadzi.[76] Imwe mumbaphatisa basa makole ninga chingolo chanu mbamupakira pamaphaphido a mphepo.

⁴Imwe mumbaphatisa basa mphepo kukhala anyamphangwanu, pontho malulume a moto kukhala anyabasanu.

⁵Imwe mwachitisa kuti dziko ikhazikike pamaziko ache, tenepo iyo nkhabe dzatekenyeka tayu.

⁶Imwe mudavazika dziko yapansi na madzi makulu ninga mkhanjo, pontho mudaphimbira mapiri.

⁷Ndzidzi udalongera imwe madzi, iwo adathawa; iwo adathawa mwakuchimbiza pidava iwo falanu kuguma ninga chiphaliwali.

⁸Iwo adakuka m'mapiri na m'maphedi, kumbuto zikhadaasasanyira imwe zile.

⁹Imwe mudaagwandira madire kuti aleke kwanisa kuwambukira kukhundu inango, towera aleke phimbira pontho dziko yapansi.

¹⁰Imwe mumbachitisa mphuno za madzi kutumbuka m'maphedi, pontho mikulo mbikuka pakati pa mapiri,

¹¹Iyo idachitisa kuti nyama zam'tsanga zigumane madzi; mwenemo mabulu am'tsanga adamalisa nyota.

¹²Mbalame zimbamanga pisa pyawo m'khundu mwa madzi mbaziimba m'nthambi za miti.

¹³Kubulukira kumusa kwanu imwe mudavumbisa mvula m'mapiri, tenepo dziko yapansi yakhuta na nsapo za mabasache.

¹⁴Imwe mumbachitisa maudzu kumera kuti ng'ombe zigumane kudya, pontho mbewu kuti munthu alime mbagumana phoso padziko yapansi:

¹⁵kuti pakhale vinyu, towera akomerwe, miti yaolivi, towera nkhope yache imusire, mkate, towera umpase mphamvu.

¹⁶Miti yamkungudza ya ku Lebanoni imbavata, miti ya MBUYA idabzala iye ile.

¹⁷Mwenemo mbalame zimbamanga pisa pyawo; chidokowe chimbamanga nsanja pansonga pa miti yamkungudza.

¹⁸Mbala zimbakhala m'mapiri akulapha, pontho mbira zimbabisala m'nkhwimba kumiyala.

¹⁹Imwe mudalenga mwezi towera pakhale ndzidzi wa miyezi; dzuwa imbadziwa ndzidzi wakuthobila.

²⁰Imwe mudasasanya mosiku, pontho mumdima pinyama pyonsene pyam'tsanga pimbafamba-famba.

²¹Nkhalamu zing'ono zimbabangula zingasaka kudya, kusaka pyakudya kumbapereka Mulungu kule.

²²Dzuwa ingabuluka, izo zimbabwerera mbizikagona kumbuto zawo.

²³Tenepo anthu ambaenda m'mabasa mwawo mbathimiza kuphata basa kufikirana mawulo.

²⁴MBUYA, imwe mwasasanya pinthu pizinji! Imwe mwapisasanya pyonsenepyo mwanzeru! Dziko yapansi yadzala na pyakulengwa pyanu.

²⁵Mwenemo muna bara ikulu, pontho yakugabuka, mule mumbakhala pyakulengwa pyakukhonda lengeseka, pikulu na ping'ono pene.

²⁶Miyadiya mikulu-mikulu imbafambapo kwenda na kubwera pontho, Leviatani, nyangume adalenga imwe ule ambasenzekamo.[77]

²⁷Onsene a iwo ambanyindira imwepo kuti muapase phoso ndzidzi unasowa iwo.

²⁸Imwe mumbaapasa, iwombo ambaidya; imwe mumbapereka phoso, tenepo iwo ambakhuta na pinthu pyadidi.

²⁹Mungaabisira nkhope yanu, iwo ambachita mantha; imwe mungaabulusira muyanu, iwo ambafa kubwerera kufumbi kudabulukira iwo kule.

³⁰Mbwenye mungatuma Mzimu wanu,[78] iwo ambalengwa; imwe mumbapereka moyo wachinchino kuna dziko yapansi.

³¹Demelero ya MBUYA ikhale kwenda na kwenda! MBUYA akomerwe na pinthu pidasasanya iye!

³²Iye ambayang'ana padziko yapansi, tenepo dziko imbatetemera; iye ambaphata mapiri, tenepo iwo ambabulusa utsi.

³³Ndinati ndiimbe kuna MBUYA moyo wanga onsene; ndzidzi unakhala ine na moyo ndinati ndiimbe nyimbo zakukuza nazo Mulungu wanga.

³⁴Iye mbakomerwe na nyimbo yanga, thangwi MBUYA ndi phata ya kukomerwa kwanga.

³⁵Anyakudawika mbabuluswe pansi pano; anthu akuipa mbaleke khalapove tayu. Kuza MBUYA, moyo wanga! MBUYA mbakuzwe!