Read cisena MASALIMO 105 Bible Online

MASALIMO 105 - cisena bible

MASALIMO 105

¹Perekani takhuta kuna MBUYA, pembedzani MBUYA; lalikani kuna madzinza pinthu pyachita iye.

²Muimbireni nyimbo zakumkuza nazo; longani pinthu pyakudodomesa pyachita iye.

³Mpaseni demelero thangwi iye ngwakuchena; mitima ya onsene ale ambasaka-saka MBUYA mbikomerwe.

⁴Ndokoni kuna MBUYA kuti akuphedzeni; mbamuthimize kufuna kukhala pamaso pache.

⁵Imwe pidzukulu pya Abrahamu, nyabasache; imwe pidzukulu pya Yakobo, munthu adasankhula iye ule: kumbukani pyakudodomesa pyachita Mulungu pile, pontho na kutonga mseru kudachita iye kule.

⁷MBUYA ndi Mulungu wathu; matongero ache ali padziko yonsene yapansi.

⁸Iye anakoya chiverano chache kwenda na kwenda; pinthu pidadumbira iye kuna mifendu chikwi pile.

⁹Iye anakoya chiverano chidachita iye na Abrahamu, pontho pidadumbira iye kuna Isake pile.

¹⁰MBUYA adachita chiverano na Yakobo, chiverano chakwenda na kwenda chile.

¹¹Iye adalonga mbati, “Ndinakupasa dziko ya Kanani; iyo inakhala yako ene.”

¹²Anthu a Mulungu akhali akuchepa, alendo m'dziko ya Kanani.

¹³Iwo adafamba-famba dziko na dziko, pontho ufumu na ufumu.

¹⁴Mbwenye Mulungu hadatawirise munthu na mbodzi ene kuapondereza tayu, na thangwi ya iwo, iye adalongera mafumu mbati,

¹⁵“Lekani kukuwaza anyabasanga akusankhulikawa; lekani khuya maprofeti angawa.”

¹⁶Iye adagwisa njala ikulu m'dziko mwawo mbaapokosera phoso yawo yonsene.

¹⁷Mbwenye iye adatuma munthu patsogolo pawo, Yosefe, akhadaguliswa ninga bitchu ule.

¹⁸Miyendo idamangwa na njema, pontho goli-goli yasimbi ikhali m'khosi mwache,

¹⁹mpakana pyonsene pikhadalonga iye kuti pinachitika pile pidakwana-kwana. Mafala a MBUYA adamtsikimizira kuti iye akhali wakulungama.

²⁰Tenepo mfumu wa dziko ya Iguputo adamsudzulisa, mtongi wa madzinza ndiye adamsudzula.

²¹Iye adamuikha kukhala mkadamu wa boma mbamuikha pontho kukhala mtongi wa dziko yonsene

²²kukhala na utongi pa mathubu a mfumu, pontho kupereka uphungu kuna akulu-akulu ache.

²³Tenepo Israele adenda ku Iguputo; Yakobo adakhazikika ninga mlendo m'dziko ya Hamu.

²⁴MBUYA adapasa ana azinji anthu ache mbaachitisa kukhala amphamvu kupiringana anyakuapondereza.

²⁵Iye adachitisa Aiguputo kuzonda anthu ache, pontho kuverana kuchitira pyakuipa anyabasache.

²⁶Tenepo iye adatuma Mose, nyabasache, pontho Aroni, adasankhula iye ule.

²⁷Iwo adachita pyakudodomesa pakati pawo mbachita pyakudodomesa m'dziko ya Hamu.

²⁸Mulungu adagwisa mdima padziko, kwache anthu a ku Iguputo hadavere tayu[79] matongero ache.

²⁹Iye adasanduza mikulo yawo kukhala chiropa mbapha nsomba zonsene mwenemo.

³⁰Dziko yawo idadzala na anyanchidwe, anyanchidwewo adadzala na m'nyumba za atongi ene.

³¹Mulungu adatonga kuti pagwe mikumbi ya ntchentche na matchunya m'dziko mwawo monsene.

³²Iye adagwisa matalala na njazi m'dziko mwawo m'mbuto mwa mvula;

³³iye adavunga mbewu zawo zamfesa na miti yamkuyu mbagwisa miti yonsene ya m'dziko mwawo.

³⁴Iye adatonga kuti nyadzombe adze, tenepo adadzadi okhonda lengeseka;

³⁵nyadzombe adadya pyakumera pyonsene piwisi m'dzikomo; adavunga mbewu zonsene.

³⁶Iye adapha ana autombo, ana autombo a m'dzikomo akuonesa mphamvu za umamunawo.

³⁷Tenepo iye adatsogolera Aisraele kuabulusa m'dzikomo; iwo adakwata siliva na golidi, pontho onsene akhali akuwanga pontho amphamvu.

³⁸Aiguputo akhachita nawo mantha, tenepo iwo adakomerwa pidabuluka iwo.

³⁹Mulungu adaaphimba na makole; adaapasa pontho moto towera kuapasa cheza na mosiku.

⁴⁰Iwo[80] adapempha, tenepo iye adaagwisira akambuma mbaapasa pontho pyakudya pya kudzulu towera iwo akhute.

⁴¹Iye adadidimula mwala, madzi mbakuka kubulukira mwenemo, mbakuka na m'thando yatchetcha ninga mkulowo;

⁴²thangwi iye adakumbuka pyonsene pidadumbira iye kuna Abrahamu, nyabasache.

⁴³Tenepo iye adatsogolera anthu ache akusankhulika kuabulusa m'dzikomo, iwombo adaimba na kukhuwa thangwi ya kukomerwa.

⁴⁴Iye adaapasa madziko a madzinza anango mbaachitisa kukwata pinthu pidabonerera anthu anango,

⁴⁵towera anthu ache avere pifunziso pyache mbakoya mwambo wache onsene. MBUYA mbakuzwe!