Read cisena MASALIMO 106 Bible Online

MASALIMO 106 - cisena bible

MASALIMO 106

¹MBUYA mbakuzwe! Perekani takhuta kuna MBUYA, thangwi iye ngwadidi; kutifuna kwache nkhokhonda mala.

²Mbani anakwanisa kulonga pinthu pyamphamvu pyachita MBUYA? Mbani anakwanisa kumkuza mwakukwanadi?

³Ngakutsanzaya ale ambavera matongero ache, ale ndzidzi onsene ambachita pyakulungama.

⁴Ndikumbukenimbo, MBUYA, ndzidzi unakomera imwe mtima anthu anu; ndiphedzenimbo ine ndzidzi unaapulumusa imwe.

⁵Ndichitiseni kukomerwa na kufamba mwadidi kwa pinthu pya anthu anu akusankhulika, kuti ndikwate khundu pa kukomerwa kwa dzinzanu, pontho kukhala pabodzi na anthu anu ndzidzi unakukuzani iwo.

⁶Ife tadawa ninga mudachitirambo makolo athu; ife ndife akudawika pontho tachita pyakuipa.

⁷Makolo athu m'dziko ya Iguputo hadavese tayu pyakudodomesa pidachita Mulungu; iwo adaduwalira ndzidzi uzinji udaaonesa iye kuafuna kwache kokhonda mala, pontho iwo adapandukira Nyakudzulu-dzulu[81] pa Nyanza Yakufira.

⁸Mbwenye iye adaapulumusa ninga mukhadadumbira iye, towera kuonesa mphamvu zache zikulu.

⁹Iye adatonga Nyanza Yakufira, tenepo madzi adauma; iye adawambusira anthu na pakuumapo.

¹⁰Iye adaapulumusa kuna anthu akhaazonda ale; iye adaaombola kuna anyamalwawo.

¹¹Mbwenye madzi adabiza anyamalwawo; nkhabe na mbodzi ene adasala okhonda kufa tayu.

¹²Penepo anthu ache adakhulupira pinthu pidadumbira iye pile mbamuimbira nyimbo zakumkuza nazo.

¹³Mbwenye iwo hadadembuke tayu kuduwalira pinthu pikhadachita iye pile mbakhonda dikhira kuti iye aapangize machitiro ache.

¹⁴M'thando yatchetcha mule iwo adadzazwa na manyerezero akuipa mbayesa Mulungu;

¹⁵natenepo iye adaapasa pinthu pidapempha iwopyo, kwache adagwisa pakati pawo utenda wakupakatisa manungo.

¹⁶M'thandomo iwo adachita bivu na Mose pontho Aroni, nyabasa wakupambulika wa MBUYA.

¹⁷Tenepo dziko yapansi idayashamula mbikhudyula Datani, pontho mbifikhira Abiramu na banjache;

¹⁸moto udagwa pana anyakuatewera mbupisa anthu akudawika ale.

¹⁹Iwo adasasanya na golidi mwanamphulu pa Phiri ya Sinai mbapembedza mfanikizowo;

²⁰iwo adachinjisa demelero ya Mulungu na mfanikizo wa nyama yakudya maudzu.

²¹Iwo adaduwalira Mulungu akhadaapulumusa ule pakuchita pinthu pikulu m'dziko ya Iguputo,

²²pinthu pyakudodomesa pyakwanga m'dziko ya Hamu, pinthu pyakudodomesa pa Nyanza Yakufira!

²³Pidalonga Mulungu kuti iye akhafuna kuvunga anthu ache, nyabasache wakusankhulika, Mose, ndiye akhali nyakukhala pakati pa Mulungu na anthu ache mbambombowesa ukali wache ukhafuna iye kuavunga nawo ule.

²⁴Tenepo iwo adakhonda dziko yakukoma, thangwi iwo hadakhulupire tayu kudumbira kudachita Mulungu kule.

²⁵Iwo adakhala m'makumbi mwawo kudungunya mbakhonda vera MBUYA.

²⁶Natenepo iye adaacheuza pikulu pene kuti iye anaachitisa kufa m'thando yatchetcha mule

²⁷mbabalalisa pidzukulu pyawo pakati pa madzinza okhonda dziwa Mulungu, mbaachitisa kufera m'madziko achilendo.

²⁸Tenepo pambuto ya Peori, anthu a Mulungu adaphatizana nawo kupembedza milungu Baala, mbadya nawo nsembe zakuperekwa kuna milungu yakufa.

²⁹Iwo adalamusa ukali wa MBUYA na pinthu pidachita iwopyo, mbapagwa muliri wakugoswa pakati pawo.

³⁰Mbwenye Finiasi adalamuka mbaatchunyusa thangwi ya kudawako, tenepo muliriwo udamala.

³¹Penepi pidamchitira umboni kuti iye ngwakulungama, pontho pinakhalapo kwenda na kwenda, mifendu yonsene inafuna kudzayo.

³²Pamphuno za madzi pa Meriba anthu adazhangalisa MBUYA, tenepo Mose akhali panyatwa thangwi ya iwo.

³³Iwo adamzhangalisa pyakwanga Mose mwakuti iye adalonga pyache nyamphotcho-photcho.

³⁴Iwo hadaphe madzinza okhonda dziwa Mulungu tayu ninga mudapangira MBUYA kuti iwo apichite,

³⁵mbwenye iwo adasemberana nawo mbakwata makhaliro awo akuipa.

³⁶Anthu a Mulungu adapembedza nawo mifanikizo, pile pidakhala msampha kuna iwo.

³⁷Iwo adapereka nsembe anawo achimuna na achikazi kuna mizimu yakuipa ya m'dziko ya Kanani.

³⁸Iwo adachuchisa chiropa cha anawo okhonda dawa, chiropa cha anawo achimuna na achikazi, adapereka iwo ninga nsembe kuna milungu ya ku Kanani ale, tenepo dzikoyo idaswipiswa na mphanduzo.

³⁹Iwo adapiswipisa okha ene na mabasawo pidachita iwo mbakhala anthu akuchita pyauputa pamaso pa Mulungu.

⁴⁰Tenepo MBUYA adazhangalira anthu ache; iye adanyansirwa na dzinzache yakusankhulika.

⁴¹Iye adaapereka pyache m'manja mwa madzinza okhonda dziwa Mulungu, pontho anyamalwawo adaatonga.

⁴²Iwo adaponderezwa na anyamalwawo mbaikhwa pansi pa utongi wawo.

⁴³Kazinji kene iye adapulumusa anthu ache, kwache iwo adasankhula pyawo kumpandukira mbalilima m'pyakudawa pyawo.

⁴⁴Kwache iye akhaava ndzidzi ukhalira iwo mbaona nyatwa zawo.

⁴⁵Thangwi ya iwo iye adakumbuka chiverano chache, pontho thangwi ya kuafuna kwache kokhonda mala iye adambombowesa ukali wache.

⁴⁶Iye adachitisa anyakuapondereza onsene kuavera nsisi.

⁴⁷Tipulumuseni, MBUYA, Mulungu wathu, pontho tibwezeni kutibulusa pakati pa madzinza, towera tipereke takhuta kuna imwe mbatikuza dzinanu yakuchena.

⁴⁸Mkuzeni MBUYA Mulungu wa Israele; mkuzeni chinchino pontho kwenda na kwenda! Munthu onsene alonge mbati, “Ameni!” MBUYA mbakuzwe!