Read cisena MASALIMO 109 Bible Online

MASALIMO 109 - cisena bible

MASALIMO 109

¹Kuna nyakutchemula nyimbo. Salimo ya Davite. Ndikukukuzani imwe, Mulungu; lekani khala mulomo phoo!

²Anyakudawika na anyakunama ambandilongera pyakuipa; iwo andilongera pyakunama,

³pontho ambalonga mafala akuonesa kundizonda kwawo mbandizungulira kundiphata okhonda na thangwi ene.

⁴Iwo akundipokanya, podi kwene kuti ine ndimbaafuna, pontho ine ndaapempherera.

⁵Iwo akubwezera pyakuipa pa chadidi, pontho chizondi pa kuafuna kwanga.

⁶Iwo akulonga kuti, “Sankhulani atongi a manyerezero akupotoka kuti amtonge mseru, pontho tawirisani anyamalwache kumsumira.

⁷Iye angatongwa mseru mbagumanwe wakudawa; kupemphera kwache mbakumchitise kukonwa!

⁸Moyo wache chinchino mbumale; munthu unango mbakwate basache!

⁹Anache mbasanduke akusowa baba, pontho mkazache mbakhale mamfelwa!

¹⁰Anache mbasanduke manzenza akupemphesa, iwo mbathamangiswe[84] m'madembe munakhala iwomo!

¹¹Anyamangawache mbakwate mfumache yonsene, pontho alendo mbakwate pyonsene pidaphatira iwo basa.

¹²Munthu unango mbaleke kumkomerave mtima, penu kutsalakana ana akusowa baba ambasiya iye ale.

¹³Pidzukulu pyache pyonsene mbapife, pontho dzinache mbiduwalike kubulukira mfendu unadzawo.

¹⁴MBUYA mbakumbuke pyakuipa pya makolo ache, pontho mbaleke lekererave pyakudawa pya mache.

¹⁵MBUYA ndzidzi onsene mbakumbuke pyakudawa pyawo, mbwenye iwo okha ene mbaduwalike monsene mwene!

¹⁶“Pyakukomera mtima anthu anango iye nkhabe kupiikha konta tayu; mbwenye iye akhasanyisa mbapha atcherengi, anyakusowa pinthu na anyakukhondwa.

¹⁷Kutemberera kukhali kudya kwache, iyembo mbatembererwe! Iye akhazonda kutsanzayisa anango, mbapaleke khalambo munthu na mbodzi ene wakumtsanzayisa!

¹⁸Iye akhavala kutemberera ninga nguwo; kutemberera kwacheko kumwerera m'manungo mwache ninga madzi, pontho m'magogodo mwache ninga mafuta!

¹⁹Ipyo mbapimfinikize ninga nguwo, pontho ndzidzi onsene mbapimzungulire ninga bande!”

²⁰MBUYA, tchunyusani anyamalwanga ninga monthomo, ale ambandilongera pyakuipa ninga penepi!

²¹Mbwenye MBUYA Wamphamvu zonsene, ndiphedzeni, towera dzinanu itambire chilemedzo, ndipulumuseni thangwi ya udidi wanu, pontho kundifuna kwanu kokhonda mala.

²²Ndine mtcherengi pontho nyakusowa pinthu; ndakuwazika mpakana pansi pa mtimanga.

²³Ninga mthunzi wa kumawulo, ine ndasala chifupi kumala; ine ndagwinywa na mphepo ninga nyadzombe.

²⁴Mabondo anga ngakusowa mphamvu thangwi ya kusowa kudya; ndasala kwene khanda na magogodo ene basi.

²⁵Anthu angandiona ambandiseka; ambandipidula mbandisedegula.

²⁶Ndiphedzeni, MBUYA Mulungu wanga; thangwi ya kundifuna kwanu kokhonda mala, ndipulumusenimbo ine!

²⁷Chitisani anyamalwanga kudziwa kuti imwe, MBUYA, ndimwe nyakundipulumusa.

²⁸Iwo anakwanisa kunditemberera, mbwenye imwe munanditsanzayisa. Anyakundisanyisawo mbakundwe,[85] pontho ine, nyabasanu, ndikomerwe.

²⁹Anyamalwanga aphimbirwe na kululupiswa; iwo avale manyadzo awo ninga mkhanjo.

³⁰Ndinagaluza fala kupereka takhuta kuna MBUYA; ndinamkuza pambuto panagumanyikana anthu azinjipo,

³¹thangwi iye ambatchinjiriza nyakutcherenga mbampulumusa kuna ale ambamtonga kuti aphiwe.