Read cisena MASALIMO 112 Bible Online

MASALIMO 112 - cisena bible

MASALIMO 112

¹MBUYA mbakuzwe! Ngwakutsanzaya munthu ambagopa MBUYA ule, ule ambakomerwa na kuvera matongero ache.

²Anache anakhala amphamvu m'dziko; pidzukulu pyache pinatsanzayiswa.

³Kufamba mwadidi kwa pinthu, pontho mfuma pinakhala m'nyumba mwache, kulungama kwache kunakhala kwenda na kwenda.

⁴Cheza chimbamwinikira anthu adidi mumdima, ale ngakukoma mtima, akuva nyambalo pontho akulungama.

⁵Ngwakutsanzaya nyakufewa manja pakufiyalisa, wakuchita pinthu pyache mwachilungamo.

⁶Ndimomwene iye nkhabe dzatekeseka tayu; nyakulungama anakumbukwa ndzidzi onsene.

⁷Iye nkhabe chita mantha tayu na kutambira mphangwa zakutsukwalisa; chikhulupiro chache ntchakuwanga, pontho iye ambanyindira MBUYA.

⁸Iye nkhabe swipa mtima tayu penu kuchita mantha; pakumalisira pache anaona anyamalwache akundwa.

⁹Iye ambapereka mwakufewa manja kuna anyakusowa pinthu; kukoma kwache mtima nkhabe mala tayu; iye anakhala wamphamvu pontho wakulemedzwa.

¹⁰Anyakudawika anaona penepi mbazhangali; anakikita mano mbakhonda onekave; chidikhiro chawo chamaliratu kwenda na kwenda.