Read cisena MASALIMO 115 Bible Online

MASALIMO 115 - cisena bible

MASALIMO 115

¹Kuna imwe ene basi, MBUYA, kuna imwe ene basi, nee kuna ife tayu, kwathema kuperekwa demelero, thangwi ya kutifuna kwanu kokhonda mala na kukhulupirika kwanu.

²Thangwi yache ninji madzinza ativunze mbati, “Ali kupi Mulungu wanu?”

³Mulungu wathu ali kudzulu, iye ambachita pyonsene pimbamkomera.

⁴Milungu yawo njakusasanywa na siliva na golidi, pontho yasasanywa na manja a munthu.

⁵Iyo ina kanwa, kwache longa tayu, ina maso, kwache nkhabe ona tayu.

⁶Iyo ina makutu, kwache nkhabe kuva tayu, ina mphuno, kwache nkhabe nunkhiza tayu.

⁷Iyo ina manja, kwache nkhabe kuva kuti akhuyanji tayu, ina manyalo, kwache nkhabe kufamba tayu; iyo nkhabe bulusa na fala ene tayu.

⁸Onsene adapisasanya na ambapinyindira ale mbasanduke[87] ninga mifanikizo idasasanya iwoyo.

⁹Nyindirani MBUYA, imwe Aisraele. Iye ambakuphedzani na kukutchinjirizani.

¹⁰Nyindirani MBUYA, imwe pidzukulu pya Aroni. Iye ambakuphedzani na kukutchinjirizani.

¹¹Nyindirani MBUYA, monsenene anyakumpembedza. Iye ambakuphedzani na kukutchinjirizani.

¹²MBUYA ambatikumbuka pontho anatitsanzayisa; iye anatsanzayisa Aisraele, pontho na pidzukulu pyonsene pya Aroni.

¹³MBUYA anatsanzayisa anyakumulemedza onsene, anyakuveka pontho na anthu ene pyawo sasawa.

¹⁴MBUYA mbakupaseni ana azinji, imwe na pidzukulu pyanu!

¹⁵Mbamutsanzayiswe na MBUYA, ule adasasanya kudzulu na dziko yapansi!

¹⁶Kudzulu nkhwa MBUYA ene basi, mbwenye adapereka dziko yapansi kuna munthu.

¹⁷Si anyakufa ambakuza MBUYA tayu, nee na mbodzi ene wakwenda kudziko ya chete[88] tayu.

¹⁸Mbwenye ife, anyakukhala na moyo, tinapereka takhuta kuna iye chinchino pontho kwenda na kwenda. MBUYA mbakuzwe!