Read cisena MASALIMO 118 Bible Online

MASALIMO 118 - cisena bible

MASALIMO 118

¹Perekani takhuta kuna MBUYA, thangwi iye ngwadidi, pontho kutifuna kwache nkhokhonda mala.

²Anthu a ku Israele mbalonge mbati, “Kutifuna kwache nkhokhonda mala.”

³Pidzukulu pya Aroni mbipilonge kuti, “Kutifuna kwache nkhokhonda mala.”

⁴Onsene anyakupembedza MBUYA alonge mbati, “Kutifuna kwache nkhokhonda mala.”

⁵Pandzidzi wanga wakusanyika ndidachemera MBUYA; iye adanditawira pakundisudzula panyatwa.

⁶MBUYA ali kukhundu kwanga, ine nkhabe dzachita mantha tayu; munthu anandichitanji?

⁷MBUYA ali kukhundu kwanga, iye ndi nyakundiphedza, pontho ndinaona anyamalwanga akukundwa.

⁸Mphyadidi kunyindira MBUYA kusiyana na kunyindira munthu.

⁹Mphyadidi kunyindira MBUYA kusiyana na kunyindira mafumu a padziko yapansi.

¹⁰Anyamalwa azinji adandizungulira; mbwenye ndidaavunga na mphamvu za MBUYA!

¹¹Iwo adandizungulira khundu zonsene; mbwenye ndidaavunga na mphamvu za MBUYA!

¹²Iwo akhali wumbi-wumbi ninga nyuchi, mbwenye adapyerera kabodzi kene ninga lupya; na mphamvu za MBUYA ndidaakunda.

¹³Ndidasoswa mwakugoswa pontho ndikhakundwa, mbwenye MBUYA adandiphedza.

¹⁴MBUYA ambandichitisa kukhala wamphamvu pontho wakuwanga; iye andipulumusa.

¹⁵Veserani kukhuwa kwakukomerwa kwa kukunda nako m'makumbi mwa anthu a Mulungu kuti: “Apichita ndi mphamvu za MBUYA!

¹⁶Mphamvu za MBUYA zachita pinthu pikulu; mkono wamadyo wa MBUYA wakunda!”

¹⁷Ine nkhabe dzafa tayu; mbwenye ndinakhala na moyo mbandilalika pinthu pyandichitira MBUYA.

¹⁸Iye anditchunyusa pyakwanga pene, mbwenye iye hadatawirise kuti ndife tayu.

¹⁹Ndifungulireni misuwo ya Nyumba ya Mulungu; ndinapitamo mbandikapereka takhuta kuna MBUYA!

²⁰Wenewu ndi msuwo wa MBUYA; anyakulungama okha basi ndiye anakwanisa kupita napo.

²¹Ndikukulemedzani, thangwi mudandiva, imwe mwandichitisa kukunda.

²²Mwala udakhonda anyakumanga nyumba ninga wakusowa basa lero wasanduka wakufunika kupiringana inango yonsene.

²³Penepi pidachitwa na MBUYA; tenepo mphyakudodomesa pyakwanga pamaso pathu!

²⁴Ino ndi nsiku ya kukunda kwa MBUYA, tendeni tikomerwe, tendeni tisekere!

²⁵Tipulumuseni, MBUYA, tipulumuseni! Tichitiseni kupikwanisa, MBUYA!

²⁶Mulungu mbatsanzayise nyakudza na dzina ya MBUYA! Kubulukira ku Nyumba ya Mulungu tikukutsanzayisani.

²⁷MBUYA ndi Mulungu; iye atipasa cheza. Na nthambi m'manja mwanu, tomani phwando mbamufambe kuzungulira guwa yansembe.

²⁸Imwe ndimwe Mulungu wanga, tenepo ndinapereka takhuta kuna imwe; imwe ndimwe Mulungu wanga, tenepo ndinalalika pya ukulu wanu.

²⁹Perekani takhuta kuna MBUYA, thangwi iye ngwadidi, pontho kutifuna kwache nkhokhonda mala.