Read cisena MASALIMO 119 Bible Online

MASALIMO 119 - cisena bible

MASALIMO 119

¹Ngakutsanzaya ale makhaliro awo ngakusowa chinthu chakupokanyisa, pontho ambakhala mwakuteweza mwambo wa MBUYA.

²Ngakutsanzaya ale ambavera upangizi wache, ale ambamsaka na mtimawo onsene.

³Iwo nkhabe chita pyakudawika tayu; iwo ambafamba m'njira zache.

⁴Imwe mwatipasa pifunziso pyanu mbamutipanga kuti tipivere mwakukhulupirika.

⁵Ndina chidikhiro kuti ndinakhaladi wakukhulupirika pakukoya matongero anu!

⁶Ngakhala ndinafungula khutu kuna matongero anu, penepo nkhabe dzachitiswa manyadzo tayu.

⁷Ndzidzi unafunza ine matongero anu akulungama, ndinakukuzani na mtima wangwiro.

⁸Ndinavera mwambo wanu; lekani kundisiya ndekha!

⁹Mphale angakwanise tani kuchitisa moyo wache kukhala wangwiro? Mphakuvera mafalanu.

¹⁰Na mtimanga onsene ndimbayesa-yesa kukusaka-sakani; ndichitiseni kuti ndileke bauka kubuluka kuna matongero anu.

¹¹Ndimbakoya mafalanu mumtima mwanga, towera ndileke kukudawirani.

¹²Ndikukukuzani, MBUYA; ndifunziseni mwambo wanu.

¹³Ndinakhuwa mwakubwereza-bwereza matongero anu onsene apereka imwe.

¹⁴Ndimbakomerwa na kuteweza upangizi wanu pyakwanga kusiyana na kukhala na mfuma ikulu.

¹⁵Ndimbanyerezera pikulu mumtima mwanga pifunziso pyanu; mbandionesesa mwadidi njira zanu.

¹⁶Ndimbakomerwa na mwambo wanu; mafalanu ine nkhabe dzaaduwalira tayu.

¹⁷Khalani wadidi kuna ine, nyabasanu, towera ndikhale na moyo mbandivera mafalanu.

¹⁸Fungulani maso anga, towera ndione pinthu pyakudodomesa pyakugumanwa m'mwambo wanu.

¹⁹Ine ndine mlendo wakugwanda kwene pyanga; lekani kundibisira matongero anu.

²⁰Mtimanga umbapha na chitchuwo; ndinafuna ndidziwe ndzidzi onsene matongero anu.

²¹Imwe mumbasumulula anyakutumbama; ale ngadzedze pontho abauka kubuluka kuna matongero anu.

²²Achitiseni kuti aleke kundishola pontho kunditikana, thangwi ine ndakoya upangizi wanu.

²³Podi kwene atongi ambagumanyikana mbaverana pyakupha ine pano, ndinanyerezera pikulu mumtima mwanga mwambo wanu.

²⁴Mwambo wanu nkhukomerwa kwanga; iwo ndi nyakundipangiza pyakuchita.

²⁵Ndikugona wakukundwa pansi pa fumbi; sisimusani moyo wanga malingana na mafalanu.

²⁶Ndidatawira na mulomo wanga pyonsene pyachita ine, tenepo imwe mudanditawira; ndifunziseni mwambo wanu.

²⁷Ndiphedzenimbo kuvesa mwadidi pifunziso pyanu, tenepo ndinanyerezera pikulu mumtima mwanga pyakudodomesa pyachita imwe.[89]

²⁸Moyo wanga wakundwa na kutsukwala; ndiwangiseni mphamvu, ninga mudadumbira imwe kuna ine.

²⁹Ndikhondeseni kwenda m'njira zakunama, pontho na udidi wanu ndifunziseni mwambo wanu.

³⁰Kukhala wakuvera ndiye chasankhula ine; ine ndaikha mtimanga pana matongero anu.

³¹Ine ndili nganganga pa upangizi wanu, MBUYA; lekani tawirisa kuti ndichitise manyadzo.

³²Ine ndinachita phinga kuvera matongero anu, thangwi imwe munandipasa kuavesa kukulu.

³³Ndifunziseni, MBUYA, kuteweza mwambo wanu, tenepo ndinaavera ndzidzi onsene.

³⁴Ndichitiseni kuvesa mwambo wanu, tenepo ndinauvera; ndinaukoya na mtimanga onsene.

³⁵Ndichitiseni kukhala wakuvera matongero anu, thangwi ndimbagumanamo kukomerwa.

³⁶Ndipaseni chikhumbo chakuvera upangizi wanu kusiyana na kukhala nyamfuma.

³⁷Phophani maso anga kuna pinthu pyakusowa basa; koyani moyo wanga malingana na kudumbira kudachita imwe.

³⁸Chitani pidadumbira imwe kuna ine, nyabasanu, pidadumbira imwe kuna anyakukugopani.

³⁹Ndipulumuseni kuna kutikanwa kumbagopa ineku; thangwi matongero anu ngadidi pyakwanga!

⁴⁰Ndina chitchuwo na pifunziso pyanu; ndipaseni moyo wachinchino, podi imwe ndimwe wakulungama.

⁴¹Ndioneseni kundifuna kokhonda mala kwachita imwe, MBUYA, pontho mundipulumuse malingana na kudumbira kwachita imwe kuna ine.

⁴²Tenepo anyakunditikana ndinakwanisa kuatawira thangwi ndimbanyindira mafalanu.

⁴³Ndichitiseni kuti ndilonge pyakuonadi ndzidzi onsene, thangwi chidikhiro changa chili pana matongero anu.

⁴⁴Ndzidzi onsene ndinavera mwambo wanu, pontho kwenda na kwenda.

⁴⁵Ndinafamba-famba pyanga mwakutakasuka, thangwi ndimbayesa kuvera pifunziso pyanu.

⁴⁶Ndinalalika upangizi wanu kuna mafumu, pontho ine nkhabe dzachita manyadzo tayu.

⁴⁷M'matongero mwanu ndimbagumanamo kukomerwa, thangwi ndimbaafuna.

⁴⁸Ndimbalemedza pontho kuafuna matongero anu; ndinanyerezera pikulu mumtima mwanga mwambo wanu.

⁴⁹Kumbukani kudumbira kudachita imwe kuna ine, nyabasanu; ipyo pyandipasa chidikhiro.

⁵⁰Podi pa nyatwa zanga zene ine ndidathondozwa, thangwi kudumbira kudachita imwe kuna ine kwandipasa moyo.

⁵¹Anyakutumbama ndzidzi onsene ambandishola, mbwenye ine handidabauka kubuluka kuna mwambo wanu tayu.

⁵²Ndimbakumbuka mwambo wanu wakale, tenepo ambandipasa chithondozo, MBUYA.

⁵³Ndingaona anyakudawa akukhonda mwambo wanu, ine ndimbaswirizwa napyo.

⁵⁴Pandzidzi ukhali ine mlendo wakugwanda kwene padziko yapansi pano, ndimbapeka nyimbo za mwambo wanu.

⁵⁵Na mosiku ndimbakukumbukani, MBUYA, mbandinyerezera pya mwambo wanu.

⁵⁶Ndimbagumana kukomerwa kwanga pakuvera pifunziso pyanu.

⁵⁷Ambafuna ine ndimwe ene basi, MBUYA; ndinadumbira kuti ndinavera mafalanu.

⁵⁸Ndikukupemphani na mtimanga onsene kuti mundikomerembo mtima ninga kudumbira kudachita imwe kuna ine.

⁵⁹Ndanyerezera pya makhaliro anga, tenepo ndimbadumbira kuteweza upangizi wanu.

⁶⁰Mwakukhonda nthontho ndimbachimbiza kuvera matongero anu.

⁶¹Podi kwene kuti anyakudawa anditeyera msampha, mbwenye ine nkhabe duwalira mwambo wanu tayu.

⁶²Pachiti-chiti na mosiku ndimbalamuka kukukuzani, thangwi matongero wanu ngwakulungama.

⁶³Ndimwe shamwali wa anyakukugopani onsene, wa onsene anyakuvera pifunziso pyanu ale.

⁶⁴MBUYA, dziko yapansi yadzala na kutifuna kwanu kokhonda mala; ndifunziseni mwambo wanu.

⁶⁵Imwe, MBUYA, ndimwe wadidi kuna ine, nyabasanu, malingana na pidadumbira imwe kuna ine.

⁶⁶Ndipaseni nzeru na udziwisi, thangwi ndimbanyindira matongero anu.

⁶⁷Mbamudzati kunditchunyusa, ine ndikhachita pyakudawa, mbwenye chinchino ndikuvera mafalanu.

⁶⁸Imwe ndimwe wadidi, pontho wakukoma mtima pyakwanga! Ndifunziseni mwambo wanu.

⁶⁹Anyakudungudza alonga pyakunama pya ine, mbwenye ine na mtimanga onsene ndimbavera pifunziso pyanu.

⁷⁰Amuna enewa ngakufa msolo pontho akukala mtima, mbwenye ine ndimbakomerwa na mwambo wanu.

⁷¹Kunditchunyusa kwanu kukhali kwadidi kuna ine, thangwi kudandichitisa kuti ndifunze mwambo wanu.

⁷²Mwambo udandipasa imwe ule ngwakufunika pikulu kuna ine kupiringana kobiri zonsene za padziko yapansi.

⁷³Na manjanu imwe mudandilenga na kundiumba; ndipaseni nzeru zakuvesa pinthu, towera ndifunze matongero anu.

⁷⁴Anyakukugopani anakomerwa angandiona, thangwi ndimbanyindira kudumbira kudachita imwe kule.

⁷⁵Ndikupidziwa kuti mwambo wanu ngwakulungama, MBUYA, pontho kuti mudanditchunyusa thangwi ndimwe wakukhulupirika.

⁷⁶Kundifuna kwanu kokhonda mala kundithondoze, ninga kudumbira kudachita imwe kuna ine, nyabasanu.

⁷⁷Ndiverenimbo nsisi, tenepo ndinakhala na moyo thangwi ndimbakomerwa na mwambo wanu.

⁷⁸Anyakutumbama mbachite manyadzo thangwi ya kundipambizira kwawo; inembo ndinanyerezera pikulu mumtima mwanga pifunziso pyanu.

⁷⁹Anyakukugopani mbadze kuna ine, onsene ambadziwa upangizi wanu ale.

⁸⁰Mtimanga mbukhale wakusowa chakupokonyisa pa mwambo wanu mbandichitiswe kuti ndileke chita manyadzo.

⁸¹Ndamaliratu na chitchuwo, MBUYA, kukudikhirani kuti mundipulumuse; chidikhiro changa ndinachiikha pana mafalanu.

⁸²Maso anga atopa na kudikhira pidadumbira imwe kuna ine pile, uku mbandili kuvunza kuti, “Munandiphedza lini kani?”

⁸³Podi kwene ndine wakusowa basa ninga budu ya vinyu yakutayiwa pakhuku; kwache sidaduwalire tayu mwambo wanu.

⁸⁴Ndidikhire kufikirana lini? Munatchunyusa lini anyakundiboneresawa?

⁸⁵Amuna akutumbama, okhonda vera mwambo wanu, akumba milindi kuti ndigweramo.

⁸⁶Matongero anu ene basi ndiye akunyindirika; anthu akundiboneresa na pyakunama; ndiphedzenimbo ine!

⁸⁷Iwo asala chifupi kundipha, mbwenye ine handidakhonde kuteweza pifunziso pyanu tayu.

⁸⁸Na thangwi ya kundifuna kwanu kokhonda mala khalani wadidi kuna ine, towera ndivere upangizi wanu.

⁸⁹Mafalanu, MBUYA, anakhala akwenda na kwenda; ngakukhazikika kudzulu.

⁹⁰Kukhulupirika kwanu kumbapirira mifendu yonsene, imwe mwathikitiza dziko yapansi pambuto pache, tenepo iyo yakhazikika.

⁹¹Mwambo wanu ngwakukhazikika na lero, thangwi pyonsenepyo pimbakutumikirani.

⁹²Mwambo wanu mbadakhonda khala phata ya kukomerwa kwanga, ine mbandidafa na kusanyika.

⁹³Ine nkhabe dzaduwalira pifunziso pyanu tayu, thangwi na ipyo imwe mwandichitisa kuti ndikhale na moyo.

⁹⁴Ine ndine wanu, ndipulumuseni! Ine ndachita phinga kuvera pifunziso pyanu.

⁹⁵Amuna akudawa akudikhira kundivunga, kwache ine ndinanyerezera pikulu mumtima mwanga upangizi wanu.

⁹⁶Ine ndaona kuti pinthu pyonsene, podi na pyangwiro pene, pina mamalisiro ache, mbwenye matongero anu ngokhonda mala.

⁹⁷Ndimbaufuna pikulu mwambo wanu! Ndimbaunyerezera pikulu mumtima mwanga nsiku zonsene.

⁹⁸Matongero anu ndimbakhala nawo ndzidzi onsene mbandichitisa kukhala wanzeru kupiringana anyamalwanga.

⁹⁹Ndimbaavesa pikulu pene kupiringana afunzisi anga onsene, thangwi ndimbanyerezera pikulu mumtima mwanga upangizi wanu.

¹⁰⁰Ndina nzeru pyakwanga kupiringana nkhalamba, thangwi ndimbavera pifunziso pyanu.

¹⁰¹Ine ndathunda makhaliro onsene akuipa, thangwi ndikufuna kuvera mafalanu.

¹⁰²Ine sidakhonde matongero anu tayu, thangwi imwe ene basi ndimwe mfunzisi wanga.

¹⁰³Mphyakukoma pyakwanga kulawa mafalanu; kutapira kupiringana uchi!

¹⁰⁴Ine ndimbaganyali nzeru kubulukira m'pifunziso pyanu, tenepo ndimbazondana na makhaliro onsene akuipa.

¹⁰⁵Mafalanu ndi nyale ya kumanyalo kwanga, pontho ndi cheza chakundimwinikira panjira panga.

¹⁰⁶Ine ndadumbira mbanditsikimiza kuvera matongero wanu wakulungama.

¹⁰⁷Nyatwa zanga, MBUYA, nsakugoswadi; ndichitiseni kukhala na moyo ninga kudumbira kudachita imwe kule.

¹⁰⁸Ivani kupemphera kwanga kwakupereka nako takhuta, MBUYA, pontho ndifunziseni matongero anu.

¹⁰⁹Ine ndasasanyika ndzidzi onsene kutaya moyo wanga;[90] ine sidaduwalire mwambo wanu tayu.

¹¹⁰Amuna akuipa anditeyera msampha, kwache sidabauke kubuluka kuna pifunziso pyanu tayu.

¹¹¹Upangizi wanu ndi mfuma yakwenda na kwenda; nkhukomerwa kwa mtimanga.

¹¹²Ndapinyerezera kuvera mwambo wanu mpakana nsiku yakufa kwanga.

¹¹³Ndimbazondana na anyakukhonda khulupirika monsene mwene kuna imwe, kwache ndimbafuna mwambo wanu.

¹¹⁴Imwe ndimwe pakubisala panga pontho nyakunditchinjirizanga; ndimbaikha chidikhiro changa pana kudumbira kudachita imwe.

¹¹⁵Bulukani pana ine, anthu akudawamwe. Ndinavera matongero a Mulungu wanga.

¹¹⁶Ndipaseni mphamvu ninga mudadumbira imwe, tenepo ndinakhala na moyo; lekani kundichitisa manyadzo pandzidzi una ine na chidikhiro!

¹¹⁷Ndiphateni, tenepo ndinapulumuka, pontho ndzidzi onsene ndinavera mwambo wanu.

¹¹⁸Imwe mumbapasa nkhodolo munthu onsene okhonda vera mwambo wanu; umpheswe wawo ngwapezi.

¹¹⁹Imwe mudayesa anyakudawa onsene ninga shuzhu ya dziko yapansi, natenepo ine ndinafuna upangizi wanu.

¹²⁰Na thangwi ya imwe ine ndina mantha; ndaphatwa na mantha thangwi ya mwambo wanu.

¹²¹Ine ndaphata pinthu pyakulungama pontho pyakuthema; lekani kundipereka m'manja mwa anyakundipondereza!

¹²²Dumbirani kuti nyabasanu, munamphedza; lekani tawirisa kuti anthu akutumbama andipondereze!

¹²³Maso anga atopa na kudikhira kuti mundipulumuse, pontho kuti pidadumbira imwe pile pikwane-kwane.

¹²⁴Chitani na ine malingana na kundifuna kwanu kokhonda mala, pontho ndifunziseni mwambo wanu.

¹²⁵Ndine nyabasanu, ndipaseni nzeru zakuvesa pinthu, towera ndidziwe upangizi wanu.

¹²⁶MBUYA, ndzidzi wanu nguno wakuti muchitepo pinthu, thangwi anthu akuswa mwambo wanu.

¹²⁷Ine ndimbafuna matongero anu kupiringana golidi, kupiringana golidi chadi-chadi ule.

¹²⁸Natenepo ndikuteweza pifunziso pyanu; mbandizondana na njira zonsene zakudawika.

¹²⁹Upangizi wanu mphyakudodomesa; ndimbapivera na mtimanga onsene.

¹³⁰Kutchululwa kwa mafalanu ambapasa cheza mbadzesa nzeru kuna anthu okhonda dziwa.

¹³¹Ndimbafungula mulomo wanga mbandipuma na befu kukhumba matongero anu.

¹³²Zungunukani kuna ine mbamundivere nsisi ninga mumbachitira imwe kuna onsene ambakufunani ale.

¹³³Chitisani manyalo anga kuimira dzololo malingana na kudumbira kwanu; lekani tawirisa kuti pyakuipa pindikunde.

¹³⁴Ndipulumuseni kuna ambandipondereza ale, towera ndivere pifunziso pyanu.

¹³⁵Nditsanzayiseni pamaso panu mbamundifunzise mwambo wanu.

¹³⁶Misozi ikugwa ninga mkulo, thangwi anthu nkhabe vera mwambo wanu tayu.

¹³⁷Ndimwe wakulungama, MBUYA, na mwambo wanu ene ngwakulungama.

¹³⁸Upangizi wapereka imwe ngwakulungama kuna onsene, pontho wakunyindirika monsene mwene.

¹³⁹Phinganga ikugaka muna ine ninga moto, thangwi anyamalwanga nkhabe ikha konta mafalanu tayu.

¹⁴⁰Kudumbira kudachita imwe nkhwakukhazikika! Ndimbapifuna pyakwanga pene!

¹⁴¹Ndine nyakukhonda funika pontho wakukhondwa, kwache ine nkhabe duwalira pifunziso pyanu tayu.

¹⁴²Kulungama kwanu kunakhala na kukhala, pontho mwambo wanu ndzidzi onsene ngwakuona.

¹⁴³Ndaphatwa na nyatwa pontho ndaswipa mtima, mbwenye matongero anu ambadzesa kukomerwa kuna ine.

¹⁴⁴Upangizi wanu ndzidzi onsene ngwakulungama; ndipaseni nzeru zakuvesa nazo pinthu, tenepo ndinakhala na moyo.

¹⁴⁵Na mtimanga onsene ndikuchemera kuna imwe; nditawireni, MBUYA, tenepo ndinavera mwambo wanu.

¹⁴⁶Ndikuchemera kuna imwe; ndipulumuseni, tenepo ndinakoya upangizi wanu.

¹⁴⁷Dzuwa mbidzati buluka ndimbachemera kuna imwe kuti mundiphedze; ndimbaikha chidikhiro changa pana kudumbira kwanu.

¹⁴⁸Mosiku onsene ndimbakhala m'maso, kunyerezera pikulu mumtima mwanga kudumbira kwanu.

¹⁴⁹Na thangwi ya kundifuna kwanu kokhonda mala, ndivesereni, MBUYA; onesani nsisi zanu mbamukoya moyo wanga!

¹⁵⁰Anyakundiboneresa akukala mtima akudza chifupi, anthu okhonda na kukoya kwene mwambo wanu.

¹⁵¹Mbwenye imwe muli chifupi na ine, MBUYA, pontho matongero anu onsene ngakukhazikika.

¹⁵²Kale-kale ndidafunza upangizi wanu; imwe mwauchitisa kuti ukhale wakwenda na kwenda.

¹⁵³Yang'anani nyatwa zanga mbamundipulumuse, thangwi ine sidaduwalire mwambo wanu tayu.

¹⁵⁴Ndikhalireni kunduli pontho mundiombole; ndipaseni moyo ninga mudadumbira imwe kuna ine.

¹⁵⁵Anyakudawa nkhabe dzapulumuswa tayu, podi iwo nkhabe vera mwambo wanu tayu.

¹⁵⁶Mbwenye kuva kwanu nyambalo, MBUYA, nkhukulu; onesani nsisi zanu mbamundipulumuse!

¹⁵⁷Ndina anyamalwa na anyakundipondereza azinji, kwache ine nkhabe chimwana kuvera upangizi wanu tayu.

¹⁵⁸Ndingayang'ana anyakundisandukirawa ndimbanyansirwa napyo, thangwi iwo nkhabe koya matongero anu tayu.

¹⁵⁹Yang'anani mumbafunira ine pifunziso pyanu, MBUYA. Kundifuna kwanu kokhonda mala nkhabe sanduka tayu, natenepo ndipulumusenimbo ine.

¹⁶⁰Mafalanu onsene ngakuona, pontho matongero anu akulungama ngokhonda mala.

¹⁶¹Amuna amphamvu andisosa akusowa na thangwi ene, mbwenye ine ndimbalemedza mafalanu.

¹⁶²Ndakomerwa pyakwanga thangwi ya kudumbira kudachita imwe, kukomerwa ninga kwa munthu angagumana mfuma.

¹⁶³Ndimbazonda na kunyansirwa na pyakunama, mbwenye ndimbafuna mwambo wanu.

¹⁶⁴Kanomwe pansiku ndimbakukuzani, thangwi ya matongero wanu wakulungama.

¹⁶⁵Ale ambafuna mwambo wanu ana mtendere pikulu, pontho nkhabe chinango chinakwanisa kuagwegwedusa tayu.

¹⁶⁶Ndimbadikhira imwe kuti mundipulumuse, MBUYA, pontho ndimbachita pimbanditonga imwe.

¹⁶⁷Ndimbavera upangizi wanu; thangwi ndimbapifuna na mtimanga onsene.

¹⁶⁸Ndimbavera pifunziso pyanu na upangizi wanu; imwe mumbaona pyonsene pimbachita ine.

¹⁶⁹Chiliro changa kufuna chiphedzo mbachifike kuna imwe, MBUYA! Ndipaseni nzeru zakuvesa pinthu malingana na kudumbira kudachita imwe.

¹⁷⁰Ivani kupemphera kwanga mbamundipulumuse malingana na kudumbira kudachita imwe.

¹⁷¹Ndzidzi onsene ndinakukuzani, thangwi mumbandifunzisa mwambo wanu.

¹⁷²Lulume yanga inaimba pya mafalanu, thangwi matongero anu ngakulungama

¹⁷³Sasanyikani ndzidzi onsene kundiphedza, thangwi ndimbateweza pifunziso pyanu.

¹⁷⁴Ndatchuwadi kwene kundipulumusa kwanu, MBUYA! M'mwambo mwanu ndimbagumanamodi kukomerwa!

¹⁷⁵Ndipaseni moyo, towera ndikukuzeni; matongero anu andiphedze.

¹⁷⁶Ndimbatsalakatika ninga bira wakutayika; tenepo idzani mundisake ine nyabasanu, thangwi ine sidaduwalire matongero anu tayu.