Read cisena MASALIMO 135 Bible Online

MASALIMO 135 - cisena bible

MASALIMO 135

¹MBUYA mbakuzwe! Kuzani dzina ya MBUYA. Mkuzeni, imwe anyabasa a MBUYA,

²mumbatumikira m'Nyumba ya MBUYA ale, m'Nyumba ya Mulungu wathu.

³MBUYA mbakuzwe, thangwi MBUYA ngwadidi; imbani nyimbo zakukuza nazo dzinache, thangwi iye ngwakukoma mtima.[93]

⁴MBUYA adapisankhulira yekha ene Yakobo, Israele kukhala anthu ache akufunika.

⁵Ndimbapidziwa kuti MBUYA wathu ngwamkulu; Mbuyathu ngwamkulu kupiringana milungu yonsene.

⁶MBUYA ambachita pimbafuna iye kudzulu pontho pansi pano, pabara, pontho na pansi pa bara.

⁷Iye ambadzesa makole kubulukira kumadolomero a dziko yapansi; mbachitisa kuti pakhale njazi ndzidzi wa chonziwo, pontho ambafungulira mphepo m'masubi mumbaikoya iye.

⁸M'dziko ya Iguputo iye adapha ana autombo a anthu mbachita chibodzi-bodzi kuna pifuyo.

⁹Kweneko iye adachita pidzindikiro na pyakudodomesa kutchunyusa napyo mfumu wa Iguputo na mathubu ache onsene.

¹⁰Iye adavunga madzinza mazinji mbapha mafumu amphamvu:

¹¹Sihoni, mfumu wa Aamori, Ogi, mfumu wa Bashani, pontho mafumu onsene m'dziko ya Kanani.

¹²Iye adapereka dziko yawo kuna anthu ache; iye adaipereka kuna anthu ache Aisraele.

¹³MBUYA, ndzidzi onsene pinavekeswa kuti ndimwe MBUYA; mifendu yonsene inakudziwani.

¹⁴MBUYA anatchinjiriza anthu ache; iye anavera nsisi anyabasache.

¹⁵Milungu ya madzinza njakusasanywa na siliva pontho golidi; ipyo pimbasasanywa na manja a anthu.

¹⁶Iyo ina kanwa, kwache nkhabe longa tayu, ina maso, kwache nkhabe ona tayu.

¹⁷Iyo ina makutu, kwache nkhabe kuva tayu; iyo nkhabe bulusa na muya ene tayu.

¹⁸Onsene ambapisasanya na ambapinyindira ale, mbasanduke[94] kukhala ninga mifanikizo idasasanya iwoyo!

¹⁹Kuzani MBUYA, imwe anthu a ku Israele; kuzani MBUYA, imwe pidzukulu pya Aroni!

²⁰Kuzani MBUYA, imwe dzinza ya Levi; kuzani MBUYA, monsenene anyakupembedza MBUYA!

²¹Kuzani MBUYA mu Zioni, mu Yerusalemu, mbuto imbakhala iye ile. MBUYA mbakuzwe!