Read cisena MASALIMO 139 Bible Online

MASALIMO 139 - cisena bible

MASALIMO 139

¹Kuna nyakutchemula nyimbo. Salimo ya Davite. MBUYA, imwe mwandisakanyula mwadidi mbamundidziwa.

²Pyonsene pimbachita ine mumbapidziwa; kubulukira kutali pyakwanga imwe mumbavesa manyerezero anga.

³Imwe mumbandiona ndzidzi unaphata ine basa, penu kupuma; imwe mumbapidziwa pyonsene pimbachita ine.

⁴Podi kwene ndidzati bulusa fala, imwe, MBUYA, mumbadziwa kale pinafuna ine longa.

⁵Imwe mwandizungulira khundu zonsene; imwe mumbanditchinjiriza na mphamvu zanu.

⁶Udziwisi wanu pana ine ngwakuzwika pyakwanga, wapiringana kuvesa kwanga pinthu.

⁷Nkhupi kunafuna ine kwenda kuthawa Mzimu wanu Wakuchena? Nkhupi kunafuna ine kuthawira kubuluka pamaso panu?

⁸Ngakhala ndidakwira kwenda kudzulu, imwe muli kweneko; ngakhala ndinagona pansi kudziko ya anyakufa, imwe muli kweneko basi.

⁹Ngakhala ndinambulukira kutali kupiringana kumabulukiro dzuwa, penu kakhala kutaliletu kumadokero dzuwa,

¹⁰imwe muli kweneko basi kunditsogolera, imwe muli kweneko basi kundiphedza.

¹¹Mbandidakwanisa kupempha kuti mdima undibise penu cheza chinandimwinikirachi chisanduke mosiku,

¹²mbwenye na kutani kwene mdima kuna imwe si mdima tayu, pontho mosiku kuna imwe wakhala ninga masikati. Mdima pontho cheza kuna imwe ntchibodzi-bodzi.

¹³Imwe mudalenga phindi yonsene ya m'manungo mwangamu; imwe mudandiphataniza pabodzi m'mimba mwa mamanga.

¹⁴Ndikukukuzani thangwi imwe mwathema kugopiwa; pyonsene pimbachita imwe mphyachilendo pontho pyakudodomesa. Penepi ndimbapidziwa na mtimanga onsene.

¹⁵Ndzidzi ukhakula magogodo anga, imwe mudachita mphole-mphole kundiphataniza pabodzi pene m'mimba mwa mamanga, pikhakula ine m'mbuto yakubisika, imwe mudapidziwiratu kuti ine ndikhali mwenemo.

¹⁶Imwe mudandioneratu mbandidzati balwa. Nsiku zikhadasankhulirwa ine m'moyo mwanga, zonsene zikhadalembwa kale m'bukhu mwanu, iwo mbadzati toma khalapo.

¹⁷Mulungu, mphyakunensa pyakwanga kudziwa manyerezero anu;[96] kudziwa kuti ngangasi!

¹⁸Mbandidachita kuti ndialengese, iwo mbadainjipa kupiringana tchetcha. Ndzidzi umbalamuka ine, ndimbakhala na imwe basi.

¹⁹Mulungu, ndikupifunadi kwene kuti muphe anyakuipawa! Ndikupifunadi kwene kuti anyachirope andileke pyawo!

²⁰Iwo ambakulongerani pyakuipa; iwo ambalongera dzinanu pinthu pyakuipa.

²¹MBUYA, anthu ambakuzondani ale, inembo ndimbaazondadi kwene! Ndimbanyansirwadi kwene nawo anyakukupandukirani ale!

²²Ine ndina chizondi chikulu nawo; ndimbaayesa ninga anyamalwanga.

²³Sakanyulani mumtima mwanga, Mulungu, mbamudziwe manyerezero anga; ndiyeseni mbamudziwe manyerezero anga.

²⁴Onani ngakhala muna ine muna chinango chakuipa, pontho ndiphateni nsenji panjira yakukhala na kukhala.[97]