Read cisena MASALIMO 140 Bible Online

MASALIMO 140 - cisena bible

MASALIMO 140

¹Kuna nyakutchemula nyimbo. Salimo ya Davite. Ndipulumuseni, MBUYA, kuna anyakuipa; nditchinjirizeni kugopesera amuna akuzunguzika.

²Ndzidzi onsene iwo ambasasanya njira za upandu, ndzidzi onsene ambalamusa chimpiningu.

³Malulume awo akhala ninga nyoka zakupha; mafala ambabulusa iwo m'kanwa mwawo akhala ninga mata a mbadza.

⁴Nditchinjirizeni, MBUYA, kuna mphamvu za anyakudawika; ndikoyeni mwadidi gopesera anthu akuzunguzika, ambafuna pyakundimanga ndale ale.

⁵Amuna akutumbama anditeyera msampha; iwo ateya misampha, pontho m'khundu-khundu mwa njiranga yonsene ateyamo misampha, towera andikweshe.

⁶Ndimbalonga kuna MBUYA kuti, “Imwe ndimwe Mulungu wanga.” Ngavani kulira kwanga, MBUYA, kufuna chiphedzo!

⁷MBUYA, Mulungu wanga, pontho nyakunditchinjiriza wamphamvu, imwe mwanditchinjiriza pankhondo.

⁸MBUYA, lekani pasa anyakuipa pinthu pinafuna iwopyo; lekani tawirisa manyerezero awo akuipa pana ine kuchitika.

⁹Lekani tawirisa anyamalwanga kuti andikunde; chitisani pinthu pyakugoswa pinandichitira iwopyo kugwera iwo ene enechiro.

¹⁰Makala akuyerima amoto mbaagwere; iwombo mbaponywe m'dzenje yakuzwika, pontho mbachimwane kubulukamo.

¹¹Anthu ambapambizira anzawo mbaleke khazikika m'dzikomo; pyakuipa mbapikhulise anthu akuzunguzikawa.

¹²MBUYA, ndimbapidziwa kuti imwe mumbachitira chilungamo atcherengi, pontho munaikhira kunduli pamseru anyakuponderezwa.

¹³Anyakulungama anakukuzanidi; iwo anati akhale pamaso panu.