Read cisena MASALIMO 143 Bible Online

MASALIMO 143 - cisena bible

MASALIMO 143

¹Salimo ya Davite. MBUYA, ngavani kupemphera kwanga! Veserani kulira kwanga kufuna chiphedzo; nditawireni thangwi ndimwe wakukhulupirika pontho wakulungama!

²Lekani kunditonga mseru ine, nyabasanu; pamaso panu nkhabe na mbodzi ene wakulungama tayu.

³Nyamalwanga akundikhulisa, pontho andikunda monsene mwene. Iye andiikha m'perezo mumdima, tenepo ndakhala ninga anthu adafa kale ale.

⁴Ine ndasanyika pyakwanga m'mtima mwanga mwakuti nkhabeve na chidikhiro chene tayu.

⁵Ndikukumbuka nsiku zapita zile; ndikunyerezera pikulu pya pyonsene pyachita imwe pile, mbandinyerezera pya mabasanu.

⁶Ndimbakwiza manjanga m'dzulu kuna imwe kupemphera; ninga mataka a ndolongo moyo wanga una nyota ya imwepo.

⁷Chinchino, MBUYA, nditawireni! Chidikhiro changa chonsene chamaliratu. Lekani kupibisa mwekha ene kuna ine, gopesera ndinakhala ninga mbodzi wa anthu ambaenda ku Chiphompho chikulu ale.

⁸Machibese onsene ndikumbuseni pya kundifuna kwanu kokhonda mala, thangwi imwe ene ndiye ambanyindira ine. Kupemphera kwanga kumbafika kuna imwe; ndioneseni njira yathema ine kufambamo.

⁹Ndimbathawira kuna imwe kuti ndibisale, MBUYA; ndipulumuseni kuna anyamalwanga.

¹⁰Mulungu wanga ndimwepo; ndifunziseni kuchita kufuna kwanu. Na Mzimu wanu wadidi nditsogolereni mwadidi m'njira zakundendemera.

¹¹Ndipulumuseni MBUYA, ninga mwadumbira imwe kuchita; na udidi wanu ndipulumuseni panyatwa zanga!

¹²Na thangwi ya kundifuna kwanu kokhonda mala, iphani anyamalwanga; vungani anyakundivuya onsene, thangwi ndine nyabasanu.