Read cisena MASALIMO 144 Bible Online

MASALIMO 144 - cisena bible

MASALIMO 144

¹Salimo ya Davite. Mbakuzwe MBUYA, Phanzwi yanga! Iye ambandifunzisa kumenya nkhondo mbandichitisa kusasanyika kumenya nkhondo.

²Iye ndi nyakundiyang'anira pontho nyakunditchinjiriza, pakubisala panga pontho dombo wanga, ambanyindira ine kuti anandikoya mwadidi ule. Iye adakunda madzinza onsene mbaaikha pansi pa utongi wanga.

³MBUYA, munthu mbani wakuti mumbamtsalakana; munthu ene pyache wakuti imwe mumbamnyerezera?

⁴Iye akhala ninga mphepo; nsiku zache zakhala ninga chigudu-gudu.

⁵MBUYA, ng'ambani thambo mbamutchitha pansi; khuyani mapiri, tenepo iwo anabulusa utsi.

⁶Tumizani cheza cha njazi mbamubalalise anyamalwanu; aponyereni matswimo kuathamangisa.

⁷Fikisani mkono wanu pano kubulukira kudzulu, ndinuleni m'madzi akuzwika, pontho ndipulumuseni; ndipulumuseni kuna mphamvu za anthu achilendo,

⁸ale nkhabe dziwa kulonga pyakuona tayu mbadumbira pyakunama.

⁹Ndinakuimbirani nyimbo yachinchino, Mulungu; ndinakuimbirani na nyakatangale.

¹⁰Imwe mumbachitisa kuti mafumu akunde mbamupulumusa nyabasanu Davite kuna talasada yakupha.

¹¹Ndipulumuseni kuna anyamalwanga akukala mtima; ndiomboleni kuna mphamvu za anthu achilendo, ale nkhabe dziwa kulonga pyakuona tayu mbadumbira pyakunama.

¹²Anathu achimuna pandzidzi wa uphaleawo mbakhale ninga mbewu yakukula mbikhala na mphamvu. Anathu achikazi mbakhale ninga nsanamira zakusemwa zakuphatisa nkhomo za nyumba yachifumu.

¹³Pikwa pyathu mbapidzale na phoso ya mtundu onsene. Mabira m'minda mwathu mbabale ana pikwi-pikwi.

¹⁴Ng'ombe zathu mbazibalane mwakuinjipa okhonda polozwa penu kutayika. Paleke khala kulira thangwi ya nyatwa m'misewu mwathumu.

¹⁵Njakutsanzaya dzinza ile kuna iwo penepi mphyakuona; ngakutsanzaya anthu ale Mulungu wawo ndi MBUYA!