Read cisena MASALIMO 145 Bible Online

MASALIMO 145 - cisena bible

MASALIMO 145

¹Nyimbo yakukuza nayo ya Davite. Ndinakuza pya ukulu wanu, Mulungu pontho mfumu wanga; ndinapereka takhuta kuna imwe kwenda na kwenda.

²Nsiku na nsiku ndinapereka takhuta kuna imwe; ndinakukuzani kwenda na kwenda.

³MBUYA ngwamkulu pontho athema kukuzwa pikulu; nkhabe munthu anakwanisa kuvesa pya ukulu wache tayu.

⁴Pinthu pyachita imwe munalemedzwa napyo kubulukira mfendu kufikirana mfendu unango; iwo analalika pya mabasanu amphamvu.

⁵Iwo analonga pya demelero yanu pontho ufumu wanu, pontho ndinanyerezera pikulu mumtima mwanga pya mabasa akudodomesa achita imwe.

⁶Anthu analonga pya mabasanu amphamvu, pontho ine ndinalalika pya ukulu wanu.

⁷Iwo anapanga anango pya udidi wanu onsene mbaimba pya kulungama kwanu.

⁸MBUYA ngwakukoma mtima pontho wakuva nyambalo, ngwakusowa chipsu pontho wakutifuna kokhonda mala.

⁹MBUYA ngwadidi kuna pyonsene pidalenga iye, pontho ambava nyambalo na pyonsene pidasasanya iye pile.

¹⁰Pyakulengwa pyanu pyonsene, MBUYA, pinakukuzani, pontho anthu onsene anapereka takhuta kuna imwe.

¹¹Iwo analonga pya demelero ya ufumu wanu wamphamvu mbapanga anango pya mphamvu zanu,

¹²towera munthu onsene adziwe pya mabasanu amphamvu, pontho pya demelero ikulu ya ufumu wanu.

¹³Ufumu wanu ngokhonda mala, pontho imwe ndimwe mfumu wakukhala na kukhala. MBUYA ngwakukhulupirika kuna kudumbira kudachita iye, pontho iye ngwakukoma mtima papinthu pyonsene pimbachita iye.

¹⁴MBUYA ambaphedza kuimira dzololo anyakugwegweduka; iye ambayenusa anyakukotama na mitolo ale.

¹⁵Pinthu pyamoyo pyonsene pimbayang'ana kuna imwe na chidikhiro, imwembo mumbaapasa phoso ndzidzi unaisowa iwo.

¹⁶Imwe mumbaapasa pyakukwana mbamuakhutisa na pyonsene pinasowa iwo.

¹⁷MBUYA ngwakulungama papyonsene pimbachita iye, wansisi papyonsene pimbachita iye.

¹⁸MBUYA ali chifupi na ambamchemera ale, anthu ambamchemera na mtima onsene ale.

¹⁹Iye ambapasa anthu ambamgopa ale pyakusowa pyawo; iye ambava kulira kwawo mbaapulumusa.

²⁰MBUYA ambakoya mwadidi munthu onsene ambamfuna ule, kwache anavunga anyakudawika.

²¹Ndzidzi onsene ndinakuza MBUYA; pyakulengwa pyache pyonsene mbapikuze dzinache yakuchena kwenda na kwenda.