Read cisena MASALIMO 148 Bible Online

MASALIMO 148 - cisena bible

MASALIMO 148

¹MBUYA mbakuzwe! Kuzani MBUYA kubulukira kudzulu, imwe anyakukhala kudzuluko.

²Mkuzeni, imwe angelo ache onsene, imwe anyankhondo ache onsene akudzulu.

³Mkuzeni, imwe dzuwa na mwezi; mkuzeni, imwe nthondowa zakuyetima.

⁴Mkuzeni, imwe kudzulu, pontho imwe madzi a padzulu pa thambo.[99]

⁵Onsene mbakuze dzina ya MBUYA! Iye adatonga, tenepo pyonsene pidalengwa;

⁶na utongi wache iye adapikhazikisa m'mbuto mwapyo kwenda na kwenda, tenepo utongi wache nkhabe dzamala tayu.[100]

⁷Mkuzeni MBUYA kubulukira pa dziko yapansi, imwe anyangume na bara zakuzwika zene;

⁸njazi na matalala, bume na makole, chonzi pimbavera matongero ache pile.

⁹Mkuzeni, imwe pitunda na mapiri, imwe miti ya nsapo na misitu;

¹⁰imwe nyama zonsene zakufuyiwa na zam'tsanga zene, zakukambadza na mbalame zene.

¹¹Mkuzeni, imwe mafumu na madzinza onsene, ana mafumu na atongi anango onsene;

¹²imwe atsikana na aphale, nkhalamba na piana pene.

¹³Onsene mbakuze dzina ya MBUYA! Dzinache njikulu kupiringana madzina anango onsene; demelero yache ili padzulu pa dziko yapansi na kudzulu kwene.

¹⁴Iye adachitisa dzinzache kukhala na mphamvu, towera anthu ache onsene amkuze, anthu a ku Israele, apamtima pache ale. MBUYA mbakuzwe!