Read cisena MASALIMO 16 Bible Online

MASALIMO 16 - cisena bible

MASALIMO 16

¹Salimo ya Davite. Mulungu nditchinjirizeni, thangwi pakubisala panga ndimwe.

²Ndikulonga kuna imwe, MBUYA kuti, “Imwe ndimwe Mbuyanga; pyonsene pyadidi pina ine pimbabulukira kuna imwe.”

³Ngadidi pyakwanga anthu akukhulupirika a MBUYA! Kukomerwa kwanga kukululetu nkhukhala pabodzi na iwo.

⁴Anthu ambathamangira milungu inango ale ambapidzesera nyatwa zizinji. Ine nkhabe dzakwatapo khundu pansembe za chiropa zimbapereka iwozo tayu; ine nkhabe dzapembedza milungu yawoyo tayu.

⁵Pyonsene pina ine, MBUYA, ndimwe ene basi, pontho imwe mumbandipasa pyonsene pinasowa ine; moyo wanga wa m'tsogolo uli m'manja mwanu.

⁶Mbuto yadidiletu yandisiyira imwe njakudodomesa, ndakomerwa nayo pyakwanga!

⁷Ndinakuza MBUYA thangwi ya kundipangiza kwache; na mosiku chikumbu mtima changa chimbandicheuza.

⁸Ndzidzi onsene ine ndimbadziwa kuti MBUYA ali pano. Iye ali m'khundu mwanga, tenepo nkhabe chinango chinakwanisa kunditekesa tayu.

⁹Natenepo mtimanga wakomerwa pyakwanga, pontho ndikupereka takhuta; ndikuonadi kuti ndikutchinjirizwa mwadidiletu,

¹⁰thangwi imwe nkhabe dzandisiya kudziko ya anyakufa tayu, penu kutawirisa nyabasanu wakukhulupirika kuvunda m'masiye.

¹¹Imwe munandionesa njira yakwendera kumoyo; kukhala kwanu chifupi na ine kumbadzesa kukomerwa kukulu kuna ine, pontho kumbadzesa kutsanzaya kuna ine kwenda na kwenda.