Read cisena MASALIMO 18 Bible Online

MASALIMO 18 - cisena bible

MASALIMO 18

¹Kuna nyakutchemula nyimbo. Nyimbo idaimba Davite nyabasa wa MBUYA kuimbira MBUYA pansiku idampulumusa iye m'manja mwa Sauli na anyamalwache anango onsene. MBUYA ndimbakufunanidi! Imwe ndimwe mphamvu zanga.

²MBUYA ndiye phanzwi yanga; iye ndiye mpandanga wamphamvu, pontho dombo wanga. Mulungu wanga nkhumwala kumbabisala ine kule, pontho ndiye mphamvu zanga zakukunda nazo. Iye ambanditchinjiriza ninga chakugedera matswimo.

³Ndimbachemera kuna MBUYA, tenepo iye ambandipulumusa m'manja mwa anyamalwanga. Mbakuzwe MBUYA!

⁴Kugoswa kwa imfa konsene kudandizungulira; mabimbi akuvunga akhandigabikira.

⁵Kugoswa kwa dziko ya anyakufa kudandizungulira, pontho masiye adanditeyera msampha.

⁶Ndzidzi wanga wa nyatwa ndidamchemera MBUYA; ndidamchemera Mulungu wanga kuti andiphedze. Iye adava falanga m'Nyumbache; iye adava kulira kwanga kufuna kuphedzwa.

⁷Tenepo dziko yapansi idatetemera mbitekenyeka; maziko a mapiri adatetemera mbatekenyeka, thangwi Mulungu azhangali.

⁸Utsi udabuluka m'mphuno mwache; malulume a moto na makala akugaka adabuluka m'kanwa mwache.

⁹Iye adang'amba thambo kati na kati mbatchitha pabodzi pene na makole akuswipa pansi kumanyalo kwache.

¹⁰Iye adambuluka mwadidi mwene pa chakulengwa chakukhala na maphaphido; iye adenda na maphaphido a mphepo.

¹¹Iye adapimpsampsira yekha ene na mdima; makole akuswipa akudzala madzi adamzungulira.

¹²Matalala na kuyerima kwa moto kudadza pamaso pache kubulukira kuna ching'ani-ng'ani mbichiswa kubola makole akuswipa.

¹³Tenepo MBUYA adadima kubulukira kudzulu; tenepo fala ya Nyakudzulu-dzulu idaveka.[9]

¹⁴Iye adaponya matswimo ache mbabalalisa anyamalwache; na kuchetuma kwa ching'ani-ng'ani iye adaagudusa.

¹⁵Pansi pa bara padaoneka mtunda; maziko a dziko yapansi akhali okhonda gudumirwa, pidaalongera imwe anyamalwanu, MBUYA, na pidaakalapira imwe na kuzhangali.

¹⁶Iye adafuthula mkono kubulukira kudzulu mbandiphata; iye adandinula m'madzi akuzwika.

¹⁷Iye adandiombola m'manja mwa anyamalwanga amphamvu, pontho onsene anyakundizonda ngamphamvu pyakwanga mwakuti ine nkhabe kwanisa kuthimbana nawo.

¹⁸Pikhali ine panyatwa, iwo adandisosa, mbwenye MBUYA adanditchinjiriza.

¹⁹Iye adandiphedza kundibulusa kwa kugoswa; iye adandipulumusa thangwi adakomerwa nane.

²⁰MBUYA ambandifupa thangwi ndimbachita pinthu pyakulungama; iye ambanditsanzayisa thangwi ndine munthu okhonda dawa.

²¹Ine ndavera mwambo wa MBUYA; ine sidadawe pakubauka kubuluka kuna Mulungu wanga tayu.

²²Ine ndakoya mwambo wache onsene; ine sidakhonde kuvera matongero ache tayu.

²³Iye ambandidziwa kuti ndikhali wakusowa chinthu chakundipokanyisa, kuti ndapithunda nee chita pyakudawa tayu.

²⁴Natenepo MBUYA ambandifupa thangwi ndimbachita pinthu pyakulungama, thangwi iye ambadziwa kuti ndine munthu okhonda dawa.

²⁵MBUYA, ndimwe wakukhulupirika kuna anyakukhulupirikambo kuna imwe; ndimwe wakulungama kuna anyakulungamambo.

²⁶Ndimwe wakuchena kuna anthu akuchenambo, mbwenye mumbanyansirwa na anyakudawika.

²⁷Anyakupichepesa, imwe mumbaapulumusa, mbwenye anyakupikuza mumbaachepesa.

²⁸Imwe, MBUYA, mumbandichitisa nyale yanga kuonesa cheza; Mulungu wanga, imwe mumbandisanduzira mdima kukhala cheza.

²⁹Mumbandipasa mphamvu zakusosa nazo gulu ya anyankhondo, pontho mphamvu zakunumphira mumpanda mwawo.

³⁰Mulungu weneyu, njira zache nsadidiletu pyakwanga! Mafala a MBUYA ngakunyindirika! Iye akhala ninga chakugedera matswimo kuna anthu onsene anabisala kuna iye ale.

³¹MBUYA ene basi ndiye Mulungu; Mulungu ene basi ndiye Phanzwi yanga.

³²Iye ndi Mulungu ule ambandipasa mphamvu, ule ambachitisa kuti njiranga ikhale yadidi.

³³Iye ambaachitisa manyalo anga kukhonda khala akuthereza ninga manyalo a nyasa; iye ambandikoya mwadidi pamapiri akulapha.

³⁴Iye ambandifunzisa kumenya nkhondo, towera ndikwanise kukweya uta wakuwangaletu.

³⁵MBUYA, mwanditchinjiriza, pontho mwandipulumusa; mkono wanu wamadyo wandithikitiza, pontho mphamvu zanu zandichitisa kukhala wamkulu.

³⁶Imwe mwandikuzira njiranga, tenepo chipo nee ndidzati gwegwedukabi.

³⁷Ndimbathamangisa anyamalwanga kuti ndiaphate; ine nkhabe kualeka mpakana ndaavunga.

³⁸Ine ndimbaamenya mbagweratu mwakuti iwo nkhabe kwanisa kulamuka; iwo ambakhala thasa kuonesa kukundwa.

³⁹Imwe mumbandipasa mphamvu zakumenyera nkhondo mbandikunda anyamalwanga.

⁴⁰Imwe mumbachitisa anyamalwanga kundithawa; ndimbavunga anyakundizonda ale.

⁴¹Iwo ambakhuwa kuti unango aaphedze, kwache nkhabe nyakuapulumusa tayu; iwo ambachemera MBUYA, kwache iye nkhabe kuatawira tayu.

⁴²Ine ndimbaapeya towera asanduke fumbi, ile imbambuluka pyawo na mphepo. Ndimbaapondedza ninga matope m'njira.

⁴³Imwe mudandipulumusa m'manja mwa anyakupandukira mbamundichitisa kukhala mtongi wa madzinza; anthu akuti nee ndikhaadziwa tayu, lero ali pansi pa utongi wanga.

⁴⁴Anthu achilendo akundilambira; sindzidzi nkhundiva kwene, iwo ambandivera.

⁴⁵Onsene ambataya mtima mbadza mwakutetemera kubulukira mumpanda mwawo.

⁴⁶MBUYA ngwamoyo! Mulemedzeni, Phanzwi yanga. Mkuzeni Mulungu, Nyankhombo wanga!

⁴⁷Iye ambandipasa mphamvu zakukundira nazo anyamalwanga; iye adaikha madzinza pansi pa utongi wanga

⁴⁸mbandipulumusa m'manja mwa anyakundizonda. MBUYA, imwe mumbandikuza pamaso pa anyamalwanga, pontho mumbandiombola kuna anyakuzunguza.

⁴⁹Natenepo ndimbakukuzani, MBUYA, pakati pa madzinza; ndimbakuimbirani nyimbo zakukukuzani nazo.

⁵⁰Mulungu ambachitisa mfumu wache kukunda kukulu; iye ambaonesa kumfuna kwache kokhonda mala kuna nyakudzozwache, kuna Davite na pidzukulu pyache ndzidzi onsene.