Read cisena MASALIMO 19 Bible Online

MASALIMO 19 - cisena bible

MASALIMO 19

¹Kuna nyakutchemula nyimbo. Salimo ya Davite. Pyakudzulu pimbaonesa pakwecha demelero ya Mulungu! Pimbaoneseratu pakwecha pinthu pyaphata iye!

²Nsiku na nsiku ipyo pimbalonga mafalawo; mosiku onsene pimbaonesa nzeru.

³Ipyo nkhabe longa, penu kukhala na chilongero, ipyo nkhabe kubulusa fala;

⁴kwache mphangwa zawo[10] zimbaenda kudziko yonsene; mafalawo ambaveka kumadolomero onsene a dziko yapansi. Mulungu adasasanyira dzuwa mbuto kudzulu;

⁵na machibese iyo imbabuluka ninga mamuna wakusekera kukazhali, pontho ninga nyamphamvu pabitcha-bitcha.

⁶Iyo imbabuluka khundu inango mbikadoka kukhundu inango ya kudzulu; iyo imbagwanda pakati na kati kwenda khundu inango. Nkhabe chinango chinakwanisa kubisalira kupisa kwache.

⁷Mwambo wa MBUYA ngwadidiletu; umbasisimusa moyo. Matongero a MBUYA ngakunyindirika, kupasa nzeru kuna anyakuzisowa.

⁸Pifunziso pya MBUYA mphyakuthema, tenepo onsene ambapiverawo ngakutsanzaya. Matongero a MBUYA mbakuveka, pontho ambapereka kuvesesa kuna manyerezero.

⁹Kugopa MBUYA nkhwadidi; kunathimizika ndzidzi onsene. MBUYA ambatonga mseru mwachilungamo; ndzidzi onsene ambatonga mwadidi.

¹⁰Matongero ache ngakufunika pikulu kupiringana golidi, ngakufunika pikulu kupiringana golidi chadi-chadi; ngakutapira pyakwanga kupiringana uchi, ngakutapira pyakwanga kupiringana uchi chadi-chadi.

¹¹Ambandipasa nzeru ine nyabasanu; ndikufupwa thangwi ya kuavera.

¹²Nkhabe munthu anakwanisa kuona kudawa kwache; ndilekerereni kuna pinthu pyanga pyakuipa pyakubisika!

¹³Mundikhondese kukhala na manyerezero akufuna kuchita pyakudawika; lekani tawirisa kudawa kundiikhe pansi pa utongi wache. Penepo ndinakhala wakusowa chinthu chakundipokanyisa, pontho wakusudzuka kubuluka kuna pyakudawa pyakugoswa.

¹⁴Mafalanga na manyerezero anga mbatawiriswembo pamaso panu, MBUYA, Phanzwi pontho Dombo wanga!