Read cisena MASALIMO 2 Bible Online

MASALIMO 2 - cisena bible

MASALIMO 2

¹Ninji madzinza akusasanya pyakupandukira? Ninji anthu akuverana pyapezi-pezi?

²Mafumu awo akupikhazikisa okha ene, atongi awo akuverana pabodzi pyakupokanyisana na MBUYA, pontho kupokanyisana na mfumu adasankhula iye ule.

³Iwo akulonga tenepa: “Tendeni tibuluke pansi pa utongi wawo, Tendeni titaye njema zawo.”

⁴Kubulukira pa mpando wache wachifumu kudzulu MBUYA akuseka, pontho akuasedegula.

⁵Tenepo iye akuacheuza mwakuzhangali, pontho akugoswa pikulu na ukali wachewo.

⁶Iye akulonga kuti, “Pa Zioni,[1] phiri yanga yakupambulika, ndadzozekapo mfumu wanga.”

⁷Mfumu akulonga kuti, “ndinalalika pyalonga MBUYA. Iye adalonga kuna ine mbati: ‘Iwe ndiwe mwananga; lero ndasanduka babako.

⁸Pempha, tenepo ine ndinakupasa madzinza onsene; dziko yonsene yapansi inakhala yako.

⁹Iwe unaaswa na mthondodzo wasimbi; unaapwetedza ninga nkhali.’ ”

¹⁰Tenepo imwe mafumu, vani kucheuzwaku; dziwani ipi, imwe atongi a padziko yapansi:

¹¹Mtumikereni MBUYA na mantha; komerwani mwakutetemera,

¹²pontho mulambireni; gopesera kuzhangali kwache kunakula kabodzi kene, pontho imwe mungafe kabodzi kene. Ngakutsanzaya ale ambaenda kuna iye, towera atchinjirizwe.