Read cisena MASALIMO 22 Bible Online

MASALIMO 22 - cisena bible

MASALIMO 22

¹Kuna nyakutchemula nyimbo. Malingana na nyimbo yakuti: “Mbala ya Machibese.” Salimo ya Davite. Mulungu wanga, Mulungu wanga, mwandisiyiranji ndekha ene? Ine ndalira pyakwanga kuti mundiphedze, mbwenye na lero chiphedzo chadzati fika tayu.

²Na masikati ndimbakuchemerani, Mulungu wanga, mbwenye imwe nkhabe kunditawira tayu; na mosiku ndimbachemera, pontho nkhabe puma tayu.

³Mbwenye imwe ndimwe Nyakuchena, nyakukhala pampando wachifumu, mbakuzwa na Israele ule.

⁴Makolo athu adaikha chikhulupiro pana imwe; iwo akhakunyindirani, natenepo imwe mudaapulumusa.

⁵Iwo adachemera kuna imwe mbathawa chakugoswa; iwo adakunyindirani, tenepo iwo hadataye mtima tayu.

⁶Mbwenye ine nee ndasalave munthubi; ndine mfunye ene pyanga wakutikanwa na wakululupiswa na munthu onsene!

⁷Anthu onsene ambandionawo ambandilulupisa; iwo ambandisedegula mbandipidula.

⁸Iwo ambalonga kuti, “Iwe umbanyindira MBUYA, apo atani kukupulumusa? Ngakhala MBUYA ambakufuna, apo atani kukuphedza?”

⁹Ndimwe ene mudachitisa kuti ine ndibalwe, pontho pikhali ine kachiya, mudandikoya mwadidi.

¹⁰Ine ndimbanyindira imwe kutomera nsiku idabalwa ine, pontho ndzidzi onsene imwe ndimwe Mulungu wanga.

¹¹Lekani khala kutali na ine! Nyatwa ili chifupi, pontho nkhabe munthu wakundiphedza.

¹²Anyamalwa azinji andizungulira ninga ng'ombe zimuna; onsene andizungulira ninga ng'ombe zimuna zakupenga zakubulukira kudziko ya Bashani.

¹³Iwo adafungula milomo yawo ninga nkhalamu, kubangula na kundikhwadzula.

¹⁴Mphamvu zanga zamala, zaenda ninga madzi akukhuthulirwa pansi. Mwakuphatanizira magogodo anga monsene mwamala lekana lekana; mtimanga ukunyunguluka ninga upula.

¹⁵Kukhosi[12] kwanga kuli kakata ninga fumbi, pontho lulume yanga yaphatirira kudzulu kwa mulomo wanga. Mwandisiya ndekha kuti ndifere pafumbi.

¹⁶Gulu ya amuna akuipa andizungulira ninga mkumbi wa anambwa; iwo abola[13] manjanga na manyalo anga ene.

¹⁷Magogodo anga onsene ali pamtunda. Anyamalwanga akundiyang'anisisa mbandiseka.

¹⁸Iwo adachitira ntsango nguwo zanga mbagawana pyawo okhokha.

¹⁹MBUYA, lekani khala kutali na ine! Nyakundiphedza, chimbizani mundipulumuse!

²⁰Ndipulumuseni gopesera talasada; pulumusani moyo wanga gopesera anambwawa.

²¹Ndipulumuseni m'kanwa mwa nkhalamuzi; nkhabe chakundiphedza[14] pamaso pa ng'ombe zimuna zakupenga zam'tsanga.

²²Ndinati ndipange abale anga pya ukulu wanu; ndinati ndikukuzeni pandzidzi unagumanyikana iwo kukupembedzani.

²³Mkuzeni iye, imwe anyabasa a MBUYA! Mulemedzeni imwe pidzukulu pya Yakobo! Mpembedzeni imwe anthu a ku Israele.

²⁴Iye hambakhonda anthu anyakusanyiswa tayu, penu akululupiswa tayu; iye hambaathawa tayu, mbwenye ambaatawira angamchemera kufuna chiphedzo.

²⁵M'migumano ikulu-ikulu ndinati ndikukuzeni, thangwi ya pyonsene pyachita imwe; pamaso pa anthu, ale ambakupembedzani ndinati ndipereka nsembe zidadumbira ine zile.

²⁶Anyakutcherenga anadya munafunira iwo; ale anadza kuna MBUYA anamkuza. Pinthu pyawo mbipiafambira mwadidi kwenda na kwenda!

²⁷Madzinza onsene anamkumbuka MBUYA. Kubulukira kukhundu zonsene za dziko iwo anazungunukira kuna iye; mitundu yonsene ya anthu inampembedza.

²⁸MBUYA ndi mfumu, tenepo iye ambatonga madzinza.

²⁹Anyakudungudza onsene analamba pamaso pache;[15] anthumbo onsene anafa ale, analamba pamaso pache.

³⁰Mifendu yam'tsogolo muno inamtumikira; amuna analonga pya Mbuya kuna mifendu inadzayo.

³¹Anthu akuti nee hadzati balwabi anapangwa pya chipulumuso chache kuti, “MBUYA adachitadi!”