Read cisena MASALIMO 24 Bible Online

MASALIMO 24 - cisena bible

MASALIMO 24

¹Salimo ya Davite. Dziko yonsene na pyonsene pili mwenemo mphya MBUYA; dziko yapansi na anthu onsene ambakhala penepo ngache.

²Iye adaimanga pabara mbaikha maziko ache pansi pa madzi akuzwika.

³Mbani anakwanisa kwenda paphiri ya MBUYA?[16] Mbani anakwanisa kapita kumbuto yache yakuchena?

⁴Ngale ene ana makhaliro na manyerezero akuchena, ale akuti hambapembedza milungu tayu, penu kudumbira pyakunama.

⁵MBUYA anati aatsanzayise; Mulungu, Nyankhombo wawo anaayesa anthu okhonda dawa.

⁶Anthu enewa ngale ambafuna kudza kuna Mulungu, ale ambafuna kudza pamaso pa Mulungu wa Yakobo.

⁷Yenukani imwe misuwo ya mipanda, pontho fungukani imwe misuwo yakale ya nyumba, tenepo mfumu wademelero anapita.

⁸Mfumu wademeleroyi mbani? Iye ndi MBUYA wamphamvu pontho wamboko, MBUYA wakukunda pankhondo.

⁹Yenukani imwe misuwo ya mipanda, fungulani imwe misuwo yakale ya nyumba, tenepo mfumu wa demelero anapita.

¹⁰Mfumu wa demeleroyi mbani? MBUYA Wamphamvu zonsene, iye ndiye Mfumu wa demelero.