Read cisena MASALIMO 25 Bible Online

MASALIMO 25 - cisena bible

MASALIMO 25

¹Salimo ya Davite. Kuna imwe, MBUYA, ndinapemphera;

²Mulungu wanga ndimbanyindira imwe. Ndipulumuseni gopesera ndinachita manyadzo ndingakundwa; lekani tawirisa anyamalwanga kuti andiseke!

³Anthu akunyindira imwe nkhabe kundwa tayu, mbwenye ambakundwa mbanthu ambachimbiza kukupandukirani ale.

⁴MBUYA ndifunziseni njira zanu; zidziwiseni kuna ine.

⁵Ndifunziseni kukhala na makhaliro akuthemerana na pyakuonadi pyanu, thangwi imwe ndimwe Mulungu, Nyankhombo wanga. Ndzidzi onsene ndimbakunyindirani.

⁶Kumbukani, MBUYA, kukoma mtima na kundifuna kwanu kokhonda mala, kule kwaonesa imwe kutomera pakutomaletu.

⁷Fudzani pyakudawa pya uphaleanga, pontho na kupandukira kwanga konsene. MBUYA, ndikumbukeni na kundifuna kwanu kokhonda mala, pontho na udidi wanu.

⁸Na thangwi yakuti MBUYA ngwadidi, pontho wakulungama, iye ambafunzisa anyakudawa njira zathema iwo kuzitewera.

⁹Iye ambatsogolera anyakupichepesa kunjira zakuthema mbaafunzisa pinafuna iye kuti iwo apichite.

¹⁰Na kukhulupirika, pontho kuafuna kwache kokhonda mala, MBUYA ambayang'anira anthu onsene ambakoya chiverano chache mbavera matongero ache ale.

¹¹MBUYA, na thangwi ya dzinanu, lekererani pyakudawa pyanga, podi kwene kuti mphizinji.

¹²Anyakugopa MBUYA anati afunze kubulukira kuna iye njira yakuthema kuitewera.

¹³Ndzidzi onsene pinthu pyawo pinaafambira mwadidi, pontho dziko inakhala ya anawo.

¹⁴MBUYA ndi shamwali wa anyakumvera, pontho ambatsikimizira chiverano chache kuna iwo.

¹⁵Ndzidzi onsene ndimbayang'ana kuna MBUYA kuti andiphedze, pontho iye ambandipulumusa kuna msampha.

¹⁶Zungunukani kuna ine, pontho ndiverenimbo nsisi, thangwi ndasala ndekha ene, pontho wakusanyika.

¹⁷Kuswipa kwanga mtima kwandendeya; ndipulumuseni panyatwa zanga.

¹⁸Yang'anani kusanyika, pontho nyatwa pinaona inepi, pontho lekererani pyakudawa pyanga pyonsene.

¹⁹Ngayang'anani kuinjipa kwachita anyamalwanga; yang'anani kundizonda kukulu kunachita iwoku.

²⁰Nditchinjirizeni, pontho ndipulumuseni; ndikoyeni gopa ndinakundwa. Ndinadza kuna imwe, thangwi ndimwe pakubisala panga.

²¹Kulungama na kuona kwanga mtima pindikoye, thangwi ndimbakunyindirani.

²²Kubuluka panyatwa zawo zonsene, Mulungu, pulumusani anthu anu a ku Israele!