Read cisena MASALIMO 27 Bible Online

MASALIMO 27 - cisena bible

MASALIMO 27

¹Salimo ya Davite. MBUYA ndiye cheza changa, pontho chipulumuso changa; ine nkhabe dzagopa munthu na mbodzi ene tayu. MBUYA ndi mpanda wa moyo wanga; ine nkhabe dzachitave mantha tayu.

²Anthu akuipa angandisosa mbayesa kundipha, iwo anagwegweduka mbagwa.

³Podi kwene kuti gulu yonsene ya anyankhondo indizungulire, ine nkhabe gopa tayu; podi kwene kuti anyamalwanga achite nane nkhondo, ine ndinathimiza basi kunyindira Mulungu.[18]

⁴Chinthu chibodzi chimbapempha ine, MBUYA; chinthu chibodzi chinafuna ine: ntchakuti ndikhale m'Nyumba ya MBUYA nsiku zonsene za moyo wanga, kuona kubalika kwa MBUYA, pontho kumsaka m'Nyumba mwache.

⁵Pandzidzi wa nyatwa iye anandibisa m'khumbi mwache; iye ananditchinjiriza m'Nyumba mwache mbandiikha pamwala wakulapha.

⁶Natenepo ndinakunda anyamalwanga andizungulirawa; na mkhuwo wakukomerwa kukulu ndinapereka nsembe m'khumbi mwache. Ndinaimba na kukuza MBUYA.

⁷Ndiverenimbo, MBUYA, ndzidzi unakuchemerani ine! Ndiverenimbo nsisi na kunditawira.

⁸Imwe mungalonga kuti, “Bwera dzandipembedze,” ine ndimbatawira kuti, “Ndinabwera MBUYA;”

⁹lekani kundibisira nkhope yanu. Lekani kuthamangisa nyabasanu mwakuzhangali. Imwe ndiye nyakundiphedza ndzidzi onsene; lekani kundisiya, penu kundikhonda, Mulungu, Nyankhombo wanga.

¹⁰Babanga na mamanga anakwanisa kundikhonda, mbwenye MBUYA ambandiyang'anira mwadidi.

¹¹Ndifunziseni, MBUYA, pinafuna imwe kuti ndipiphate, pontho munditsogolere kunjira yadidi, thangwi anyamalwanga ngazinji.

¹²Lekani kundipereka m'manja mwa anyamalwanga, ale andipandukira mbandilongera pyakunama, pontho pyakugoswa.

¹³Ndikupidziwa kuti ndinati ndione udidi wa MBUYA pandzidzi uno una ine na moyo.

¹⁴Nyindirani MBUYA. Khalani na chikhulupiro, lekani taya mtima. Nyindirani MBUYA.