Read cisena MASALIMO 30 Bible Online

MASALIMO 30 - cisena bible

MASALIMO 30

¹Nyimbo ya pamwambo wakupambulira Nyumba ya Mulungu; Salimo ya Davite. Ndinakukuzani, MBUYA, thangwi mwandipulumusa, pontho nee mwatawira kuti anyamalwanga andiseke tayu.

²Ndidakulirirani kuti mundiphedze, MBUYA, Mulungu wanga, pontho imwe mudandiwangisa.

³MBUYA, imwe mudandibwezera kumoyo kubulukira kudziko ya anyakufa; mudapulumusa moyo wanga kuti ndileke tchithira ku Chiphompho chikulu.

⁴Muimbireni MBUYA, imwe anthu ache onsene akukhulupirika, pontho kuzani dzinache yakuchena.

⁵Kuzhangali kwache nee kumbadintcha kumalabi, mbwenye udidi wache ngwakukhala na kukhala. Unakwanisa kulira mosiku onsene, mbwenye na machibese kumbadza kukomerwa.

⁶Pidaona ine kuti ndikhali pakupata ndidalonga ndekha ene kuti, “Ine nkhabeve dzatekenyeka tayu.”

⁷Imwe mukhali wadidi kuna ine, MBUYA; imwe mudandikhazikisa ninga phiri. Mbwenye pidabisa imwe nkhope yanu kuna ine, penepo ndikhachita mantha.

⁸Ndidakuchemerani imwe, MBUYA; ndidakupemphani kuti mundiphedze.

⁹“Kufa kwanga kunakuganyalisaninji? Kwenda kwanga kumasiye kunakuganyalisaninji? Ayi anthu akufa ambakwanisa kukukuzani? Ayi iwo anakwanisa kulalika pya udidi wanu okhonda mala?

¹⁰Ndiverenimbo ine, MBUYA, pontho mundiverembo nsisi! Ndiphedzenimbo, MBUYA!”

¹¹Imwe mwasanduza kutsukwala kwanga kukhala kuvina; imwe mwabulusa kutsukwala kwanga mbamundiphimbira na kukomerwa.

¹²Natenepo ine nkhabe khala mulomo phoo tayu; ndinati ndiimbe nyimbo zakukukuzani nazo. MBUYA, imwe ndimwe Mulungu wanga; ndinati ndipereke takhuta kuna imwe kwenda na kwenda.