Read cisena MASALIMO 31 Bible Online

MASALIMO 31 - cisena bible

MASALIMO 31

¹Kuna nyakutchemula nyimbo. Salimo ya Davite. Ndikudza kuna imwe, MBUYA, kuti ndibisale; lekani tawirise kuti ndikundwe. Imwe ndimwe Mulungu wakulungama; ndikupempha kuti mundipulumuse.

²Ndiverenimbo ine! Ndipulumuseni chinchino pano! Khalani pakubisala panga kunditchinjiriza; mpandanga wamphamvu kundipulumusa.

³Podi imwe ndimwe pakubisala panga, pontho mpandanga wamphamvu; ndiyang'anireni, pontho mundiphate nsenji malingana na kudumbira kwanu.

⁴Ndiyang'anireni mwadidi gopesera msampha wateyerwa inewu, thangwi ndimwe pakubisala panga.

⁵Ndinapereka mzimu wanga m'manja mwanu; ndiomboleni, MBUYA, Mulungu wakukhulupirika.

⁶Ine ndimbazondana na anyakupembedza mifanikizo yapezi-pezi; mbwenye ndimbanyindira imwe ene basi, MBUYA.

⁷Ndinakomerwa, pontho kusekera, thangwi ya kundifuna kwanu kokhonda mala. Thangwi imwe mudaona nyatwa zanga, pontho mudadziwa kusanyika kudachita ine.

⁸Imwe nee mwandipereka m'manja mwa anyamalwanga tayu; mbwenye mudapondesa dzinyalo yanga pambuto ikulu.

⁹Ndiverenimbo nsisi ine, MBUYA, thangwi ndasanyika pyakwanga; maso anga atopa, thangwi ya chiliro chikulu; mzimu wanga na manungo anga pyamaliratu na kutsukwala.

¹⁰Moyo wanga wasanyika na kutsukwala, pontho pyaka pyanga pyavira na nyatwa. Ndasowa mphamvu thangwi ya nyatwa zanga zonsene;[21] magogodo anga agogobodoka.

¹¹Anyamalwanga onsene akunditonja, maka-maka atsanthembanga; anzanga akundinyerezera ninga munthu wakugoswa; anthu angandiona pakwecha ambandithawa.

¹²Ndaduwalika ninga nyakufa; ndakhala ninga mulinga yakusweka.

¹³Thangwi ndava chiwere-were cha anthu azinji, mantha andiphata. Iwo adapangana pyakundiphata mbatsikimiza pya kundipha.

¹⁴Mbwenye ine ndimbanyindira imwepo, MBUYA; ndimwe Mulungu wanga.

¹⁵Ndzidzi onsene mumbandiyang'anira ndimwe; ndipulumuseni m'manja mwa anyamalwanga, kuna anyakundikhulisa ale.

¹⁶Yang'anani nyabasanu mwakumkomera mtima; mundipulumuse thangwi ya kundifuna kwanu kokhonda mala.

¹⁷Lekani kundichitisa manyadzo, ndingakuchemerani, MBUYA, mbwenye chitisani manyadzo anthu akuipawa mbaenda kachete-chete kudziko ya anyakufa.

¹⁸Matamisani anyakunama, onsene akudungudza na akutumbama, ale ambalulupisa anthu akulungama.

¹⁹Udidi wanu ngukulu pyakwanga, ule udakoyera imwe anyakukugopani, pontho anyakubisala muna imwe ale, udidi ule udapereka imwe pamaso pa anthu onsene.

²⁰Muna imwe munati muabise gopesera anyakusasanya pyakuipa; munati muabise m'khumbi gopesera kutikanwa na anyamalwawo.

²¹Mbakuzwe MBUYA, thangwi andionesa kundifuna kwache kokhonda mala, ndzidzi ukhadazungulirwa ine na anyamalwanga.

²²Ine ndikhachita mantha mbandinyerezera kuti iye andithamangisa pamaso pache, kwache adava kulira kwanga pidamchemera ine kufuna chiphedzo.

²³Funani MBUYA, imwe anthu ache akukhulupirika onsene. MBUYA ambatchinjiriza anthu akukhulupirika, mbwenye ambatchunyusa anyakudungudza mwakuthemerana na pidachita iwo.

²⁴Khalani na mphamvu, pontho wangani mtima, imwe monsene ale muna chidikhiro pana MBUYA.