Read cisena MASALIMO 33 Bible Online

MASALIMO 33 - cisena bible

MASALIMO 33

¹Imwe anyakulungama onsene, khuwani na kukomerwa, thangwi ya pinthu pyachita MBUYA; mkuzeni imwe monsene anyakumvera.

²Perekani takhuta kuna MBUYA pakumuimbira na anyakatangale; muimbireni na malimba.

³Muimbireni nyimbo zitswa; muimbe mwaluso pontho mwakugaluza fala thangwi ya kukomerwa.

⁴Mafala a MBUYA ngakuona, pontho mabasache ngakunyindirika.

⁵MBUYA ambafuna pyakulungama, pontho chilungamo pa miseru; kutifuna kwache kokhonda mala kwadzala dziko yonsene yapansi.

⁶Na mafalache MBUYA adalenga kudzulu, dzuwa, mwezi na nyenyezi pakuchita kulonga.

⁷Iye adagumanyisa bara zonsene mbaaikha m'dudu; iye adafungira kuzwika kwa madzi m'masubi akukoyeramo pinthu.

⁸Gopa MBUYA, iwe dziko yonsene yapansi; mulemedzeni imwe anthu onsene a padziko yapansi.

⁹Pidalonga iye, dziko yapansi idalengwa; na matongero ache pyonsene pidaoneka.

¹⁰MBUYA azunguza manyerezero a madzinza; iye ambaakhondesa kuchita pinthu pimbanyerezera iwo.

¹¹Mbwenye pinthu pimbanyerezera MBUYA kupichita mphyakwenda na kwenda; kufuna kwache nkhwakukhala na kukhala.

¹²Njakutsanzaya dzinza, ile kuna iwo Mulungu ndi MBUYA; ngakutsanzaya anthu adasankhula iye kukhala anthu ache ene ale!

¹³MBUYA ambayang'ana pansi kubulukira kudzulu, mbaona anthu onsene.

¹⁴Kubulukira kumbuto kumbakhala iye, ambayang'ana pana anthu onsene ambakhala padziko yapansi ale.

¹⁵Iye asasanya mitima yawo yonsene mbadziwa pyonsene pinachita iwo.

¹⁶Mfumu nkhabe kunda thangwi anyankhondo ache ngamphamvu tayu; nyankhondo nkhabe kunda thangwi ya mphamvu zache tayu.

¹⁷Kunyidira akavalo pankhondo nkhabe phedza tayu; mphamvu zawo zikulu nkhabe kupulumusa tayu.

¹⁸MBUYA ambayang'ana pana anyakumvera, ale ambanyindira kuafuna kwache kokhonda mala.

¹⁹Iye ambaapulumusa kuimfa; iye ambaakoya na moyo ndzidzi wa njala ikulu.

²⁰Ife timbaikha chidikhiro chathu pana MBUYA; iye ndiye chakugedera matswimo chathu, pontho nyakutiphedza.

²¹Mitimathu yakomerwa thangwi ya iye; timbanyindira dzinache yakuchena.

²²MBUYA, kutifuna kwanu kokhonda mala kukhale nafe, pinaikha ife chidikhiro chathu pana imwe.