Read cisena MASALIMO 34 Bible Online

MASALIMO 34 - cisena bible

MASALIMO 34

¹Salimo ya Davite, ule adabuluka pamaso pa Abimeleki pidapisangiza iye kukhala nyansala, pontho pidathamangiswa iye na Abimeleki. Ndzidzi onsene ndimbalemedza MBUYA; ine nkhabe dzaleka kumkuza tayu.

²Ndinati ndinyadire pinthu pyachita MBUYA; onsene anyakusanyiswa ave mbasekera.

³Lalikani pabodzi na ine demelero ya MBUYA; tendeni timkuze tonsene pabodzi.

⁴Ndidapemphera kuna MBUYA, tenepo iye adachita pidampempha ine; iye adandibulusira mantha onsene.

⁵Anyakusanyiswa ambayang'ana kuna iye, tenepo iwo akomerwa; iwo nkhabeve dzakhala na nkhope zakutota tayu.

⁶Anthu anafuna kuphedzwa ambamchemera, tenepo MBUYA ambaatawira; iye ambaapulumusa panyatwa zawo zonsene.

⁷Angelo ache ambayang'anira anyakugopa MBUYA mbaapulumusa kuna pyakugoswa.

⁸Muyeseni MBUYA mumuone udidi wache. Ngakutsanzaya ale ambabisala kuna iye.

⁹Mulemedzeni MBUYA imwe anthu ache onsene; ale anyakugopa ana pyonsene pinasowa iwo.

¹⁰Podi nkhalamu zene zimbasowa kudya nsiku zinango; mbwenye nyakusaka MBUYA nkhabe sowa pinthu pyadidi tayu.

¹¹Bwerani, ananga, mbamundivesere, ndinati ndikufunziseni kugopa MBUYA.

¹²Kadi imwe munafuna tayu kukhala na moyo wakutsanzaya? Kadi imwe munafuna tayu kukhala na moyo wakulapha pontho wadidi?

¹³Tenepo lekani kulonga pinthu pyakuipa, pontho kulonga pinthu pyakunama.

¹⁴Thawani kutali na pyakuipa mbamuchite pinthu pyadidi; chitani phinga kufuna mtendere na kuuteweza na mtimanu onsene.

¹⁵MBUYA ambayang'ana anyakulungama mbava kulira kwawo.

¹⁶Mbwenye MBUYA ambapasa nkhodolo anyakuipa, towera iwo angafa, aduwalike msanga.

¹⁷Anyakulungama ambachemera MBUYA, tenepo iye ambaava; iye ambaapulumusa panyatwa zawo zonsene.

¹⁸MBUYA ali chifupi na anyakusweka mtima; iye ambapulumusa anyakutaya chidikhiro chawo chonsene.

¹⁹Munthu wadidi ambaona nyatwa papinthu pizinji, mbwenye MBUYA ambampulumusa kupyonsenepyo;

²⁰iye ambamkoya mwadidiletu; podi na gogodo yache ene ibodzi nkhabe sweka tayu.

²¹Pyakuipa pinapha nyakudawika, ale ambazondana na chilungamo anatchunyuswa.

²²MBUYA anaombola anthu ache, ale ambaenda kuna iye kuti abisale nkhabe dzakonwa tayu.