Read cisena MASALIMO 35 Bible Online

MASALIMO 35 - cisena bible

MASALIMO 35

¹Salimo ya Davite. MBUYA apokanyeni anyakundipokanya, pontho menyani ambamenyana na ine ale!

²Kwatani chakugedera nacho matswimo na pida pyanu pyankhondo mbamudze kuti mundipulumuse.

³Thukulani dipanu na mbadzo yanu kumenyana na anyakundithamangisa. Ndipangeni kuti munandipulumusa.

⁴Anthu ambayesa pyakundipha ale, mbakundwe, pontho achite manyadzo! Ale ambaverana pyakupokanyisana na ine mbathawe, pontho azunguzike!

⁵Iwo akhale ninga dzungu yakumbuluka na mphepo pinaathamangisa mngelo wa MBUYA!

⁶Njirawo mbikhale yamdima, pontho yamitherezi uku mngelo wa MBUYA akuathamangisa!

⁷Okhonda na thangwi ene iwo adanditeyera msampha mbakumba mulindi ukulu kuti ndigweremo kundiphata.

⁸Mbwenye kuvunga kunati kuafikire iwo mbadzati kupidziwa; iwo anakwesheka msamphawo onthowo mbagweremo mu kuvungika konthoko.

⁹Tenepo ndinasekera thangwi ya MBUYA; ndinakomerwa thangwi iye adandipulumusa.

¹⁰Na mtimanga onsene ndinalonga kuna MBUYA kuti, “Nkhabeve unango ninga imwe. Imwe mumbapulumusa anyakusowa mphamvu kuna anyamphamvu, anyakutcherenga kuna anyakuapondereza.”

¹¹Anyakuipa ambandilongera umboni wakunama; iwo ambandinamizira mseru wakuti sinaudziwave tayu.

¹²Iwo ambandibwezera chakuipa pa chadidi; iwo akutcherengesa moyo wanga.

¹³Mbwenye pikhadwala iwo, ndidavala masakha kualirira; ndidapimana kudya; kwache pidakhonda kuviwa kupempha kwanga, ndidaasintili pikulu pene,

¹⁴khala ninga ndikusintili abale anga penu ashamwali anga. Ndidathimiza basi kubulumunda pikhalira ine ninga munthu wakusintili mache.

¹⁵Mbwenye pikhali ine panyatwa, onsene adakomerwa; anyakundisosa okhonda dziwika adagumanyikana kundisedegula mbathimiza basi kundimenya.

¹⁶Ninga mumbachitira anyakukhonda tsalakana Mulungu, iwo adandisedegula mbandikikitira mano.

¹⁷MBUYA, munandiyang'ana kwene kufikirana lini? Pulumusani moyo wanga kuna kundisosa kwawo; pulumusani moyo wanga gopesera zinkhalamuzi!

¹⁸Tenepo ine ndinapereka takhuta pamgumano wa anthu anu; ndinakukuzani pamaso pawo onsene.

¹⁹Lekani tawirisa anyamalwanga akunama ale kundiseka thangwi ya kukundwa kwanga. Lekani tawirisa anyakundizonda okhonda mathangwi kulonga mwakukunyula maso pya kutsukwala kwanga.

²⁰Iwo nkhabe longambo mwaushamwali tayu; m'mbuto mwache ambalonga tsweda yamtundu na mtundu anyakufuna pya mtendere.

²¹Iwo ambandisumulula mbalonga mbati, “Tidapiona pidaphata iwe!”

²²Mbwenye imwe, MBUYA, mwapiona penepi; tenepo, MBUYA, lekani khala mulomo phoo; lekani khala kutali!

²³Lamukani, Mbuya, munditchinjirize; lamukani, Mulungu wanga, mukhale nyakundivunulira.

²⁴Imwe, MBUYA, ndimwe wakulungama, natenepo ndiyeseni okhonda dawa; lekani tawirisa anyamalwanga kundiseka.

²⁵Lekani kuatawirisa kulonga mbati, “Tamkotola! Penepi ndiye pikhafuna ife!”

²⁶Anyakundiseka thangwi ya kusanyika kwanga mbamale kundwa, pontho azunguzike monsene mwene; anthu ale ambapiyesa kuti iwo mbwenye kupiringana ine mbachite manyadzo pontho alulupiswe.

²⁷Anyakufuna kuona kukhonda dawa kwanga pamseru mbakhuwe na kukomerwa, pontho ndzidzi onsene alonge mbati, “MBUYA ngwamkulu pyakwanga! Iye akomerwa na kupikwanisa kwa nyabasache.”

²⁸Tenepo ndinalalika pya kulungama kwanu; ndinakukuzani nsiku yonsene yamumphu.