Read cisena MASALIMO 36 Bible Online

MASALIMO 36 - cisena bible

MASALIMO 36

¹Kuna nyakutchemula nyimbo. Salimo ya Davite, nyabasa wa MBUYA. Kudawa kumbalonga kuna nyakudawika pansi mumtimache; iye ambakhonda Mulungu, pontho iye nkhabe kumgopa tayu.

²Thangwi iye ambapinyerezera kuti ngwakufunika pikulu; mwakuti iye hambadzindikira, penu kuzondana na kudawa kwacheko tayu,

³Mafalache ngakudawika, pontho ngakunama; iye nkhabe chita pinthu pyanzeru, pontho pyadidi tayu.

⁴Iye ambanyerezera pyakuipa pinagona iye patalimba pache; nkhabe chibodzi chadidi chimbachita iye tayu, pontho iye nkhabeve khonda pyakuipa.

⁵MBUYA, kutifuna kwanu kokhonda mala kwafika kudzulu; kukhulupirika kwanu kwakula mpakana kuthambo.

⁶Kulungama kwanu kwaimira ninga mapiri; chilungamo chanu chakhala ninga kuzwika kwa bara. Anthu na nyama zene pili m'manja mwanu, MBUYA.

⁷Mulungu, kutifuna kwanu kokhonda mala nkhwakufunika pyakwanga! Ife timbabisala[23] m'maphaphido anu.

⁸Timbachita phwando na pyakudya pizinji pimbatipasa imwe pile; mumbatitawirisa kumwa madzi akubulukira mumkulo wa udidi wanu.

⁹Imwe ndimwe phata ya moyo, pontho timbaona cheza thangwi ya cheza chanu.

¹⁰Thimizani kuafuna kokhonda mala anyakukudziwani, pontho kuchita pyadidi kuna anyakulungama.

¹¹Lekani tawirisa anyakudungudza kundisosa, penu anyakudawika kundichitisa kuti ndithawe.

¹²Onani kwagwera anyakuipa. Iwo ali thasa-thasa, akuchimwana kulamuka.