Read cisena MASALIMO 37 Bible Online

MASALIMO 37 - cisena bible

MASALIMO 37

¹Salimo ya Davite. Lekani swipa mtima na anyakuipawa; lekani kuchita bivu na anyakuchita pyakudawa.

²Chinchino iwo hanaonekave tayu ninga maudzu; iwo anadudumuka ninga mbewu ziwisi.

³Nyindirani MBUYA, pontho chitani pyadidi; khalani m'dziko, pontho mukhale pakupata.

⁴Saka-sakani kukomerwa kwanu muna MBUYA, pontho iye anakupasani pikhumbo pya mtimanu.

⁵Piperekeni mwekha ene kuna MBUYA; mnyindireni, tenepo iye anakuphedzani;

⁶iye anachitisa kulungama kwako kuonesa cheza ninga m'makalakwecha, chilungamo chako ninga masikati.

⁷Pirirani, pontho dikhirani MBUYA kuti apichite; lekani swipa mtima na anthu ale pinthu pyawo pimbaafambira mwadidi, pontho ale ambapikwanisa papinthu pakuipa.

⁸Lekani tawirisa kuzhangali, penu ukali kukutongani; lekani pinda; penepi pimbadawisa munthu.

⁹Anyakunyindira MBUYA anatambira dziko, mbwenye anyakudawa anathamangiswa.

¹⁰Chinchino pano anyakudawika hanaonekave tayu; imwe munaasaka-saka, kwache nee munaagumanabi;

¹¹anyakupichepesa anatambira dziko mbasekera na kufamba mwadidi kwa pinthu pyawo, pontho na kukhala kwawo na mtendere.

¹²Anyakuipa ambasasanya kuchitira pyakuipa anthu adidi, mbaakikitira mano.

¹³Mbwenye MBUYA ambaaseka anyakudawika, thangwi iye ambadziwa kuti chinchino anati avungwe.

¹⁴Anyakudawika ambacholola matalasadawo mbakunga mautawo kuti aphe anyakutcherenga na anyakusowa pinthu, kuti acheke pakhosi anyakuchita pyakulungama;

¹⁵kwache iwo anaphiwa na matalasadawo onthowo, pontho mautawo anatcholwa.

¹⁶Pyakuchepa pya nyakulungama mphyadidi kupiringana mfuma yonsene ya nyakudawika,

¹⁷thangwi MBUYA anapokosera mphamvu za anyakudawa onsene, mbwenye anaphedza anthu adidi kuimira dzololo.

¹⁸MBUYA ambayang'anira mwadidi anyakumvera, tenepo dziko inakhala yawo kwenda na kwenda.

¹⁹Iwo nkhabe dzabonera pandzidzi wa nyatwa tayu; iwo anakhala na phoso yakukwana pandzidzi wa njala ikulu.

²⁰Mbwenye anyakudawika anati afe; anyamalwa a MBUYA anati abisike ninga maluwa am'tsanga; iwo anabisika ninga kumala kwa utsi.

²¹Nyakudawika ambafiyali mbakhonda bwezera, mbwenye munthu wadidi ambapereka mwakufewa manja.

²²Anyakutsanzayiswa na MBUYA anatambira dziko, mbwenye anyakutembererwa na iye anathamangiswa.

²³MBUYA ambatsogolera munthu m'njira yakuthema kufambamo, pontho ambatchinjiriza ale ambakomerwa na iye.

²⁴Ngakhala iwo anagwegweduka, iwo nkhabe dzagwa tayu, thangwi MBUYA anaaphata pamkono.

²⁵Ine ndalila kalambiramo; ndakhala na moyo ndzidzi ukulu ene, kwache nee ndidzati kuona nyakulungama akupaswa nkhodolo na Mulungu tayu, penu anache kupempha phoso nkhabe.

²⁶Ndzidzi onsene ambapereka pezi mbafiyalisa kuna anango, pontho anache ntchitsanzayiso.

²⁷Thawani pyakuipa mbamuchite pinthu pyadidi, tenepo pidzukulu pyanu pinakhala ndzidzi onsene m'dzikomu.

²⁸Thangwi MBUYA ambafuna chilungamo; iye nkhabe kuakhonda anthu ache akukhulupirika tayu. Iye ambaatchinjiriza kwenda na kwenda, mbwenye pidzukulu pya anthu akuipa pinathamangiswa.

²⁹Anthu akulungama anatambira dziko mbakhalamo kwenda na kwenda.

³⁰Mafala a munthu wadidi nganzeru, pontho ndzidzi onsene lulume yache imbalonga pyakulungama.

³¹Mwambo wa Mulungu wache aukoya mumtima mwache; dzinyalo yache nkhabe therezika tayu.

³²Anyakudawika ambabisala kudikhirira anyakulungama kufuna kuti abuluse moyo wawo,

³³mbwenye MBUYA nkhabe dzaaleka m'manja mwa anyamalwawo, penu kuatawirisa kukonwa angadza nawo dzaatonga mseru.

³⁴Ikhani chidikhiro chanu pana MBUYA, pontho verani matongero ache; iye anakulemedzani pakukupasani dziko, pontho munaona anyakudawika akuvungwa.

³⁵Ine ene pano ndaona nyakuipa, pontho wakugoswa; nyakupiikha yekha ene padzulu pa onsene ninga kuvata kwa muti wamkungudza wa Lebanoni;[24]

³⁶mbwenye pidagwanda nsiku pang'ono ndidagwanda[25] na penepo, mbwenye iye akhali nkhabepo; ndidamsaka-saka, kwache nee ndidamgumanabi.

³⁷Muoneseseni munthu wadidi, pontho onani munthu wakulungama; munthu wamtendere ambakhala na pidzukulu,

³⁸mbwenye anyakudawa anavungika monsene mwene, pontho pidzukulu pyawo pinamaliratu.

³⁹Chipulumuso cha nyakulungama chimbabulukira kuna MBUYA; iye ndiye mpandawo pandzidzi wa nyatwa.

⁴⁰MBUYA ambaaphedza mbaapulumusa; iye ambaapulumusa m'manja mwa anthu akudawika, thangwi ambabisala kuna iye.