Read cisena MASALIMO 38 Bible Online

MASALIMO 38 - cisena bible

MASALIMO 38

¹Salimo ya Davite; chikumbuso. MBUYA, lekani kundilongera mwakuzhangali; lekani kunditchunyusa na ukali wanu.

²Imwe mwandipasa pironda na matswimo anuwo; mwandimenya ine mbandigweratu pansi.

³Thangwi ya kuzhangali kwanu ine ndikuva kupha pyakwanga; manungo anga onsene ana utenda thangwi ya pyakudawa pyanga.

⁴Ine ndikubira m'madzi a pyakudawa pyanga; pyakudawa pyanga pyakula pyakwanga mwakuti ine nkhabe kwanisa kupithukula tayu.

⁵Thangwi ya kupupwa kwanga, pironda pyanga pikununkha pontho pyavunda.

⁶Ine ndikuchitiswa kukotama, pontho kuthasamiswa; ndimbalira masikati onsene.

⁷Manungo anga akusanyika na kuva kupha, pontho ndili chifupi kufa.

⁸Ndamaliratu pano, pontho mzimu wanga wapeyeka; mtimanga ukusanyika pyakwanga, pontho ndimbabulira na akuva kupha.

⁹Mbuya, imwe mukudziwa pinafuna ine; mumbava kubulira kwanga konsene.

¹⁰Mtimanga ukudima, mphamvu zanga zamala, pontho maso anga athima.

¹¹Ashamwali anga na anzanga akundichalira, thangwi ya pironda pyangapi; podi na banjanga ene imbakhala kutali na ine.

¹²Anyakufuna pyakundipha anditeyera msampha, pontho anyakufuna pyakundikuwaza akundigoswa kuti andivunge; iwo nkhabe leka kuverana pyakundichita pyakuipa.

¹³Ine ndakhala ninga dodo, munthu okhonda kwanisa kuva, ninga bewewe, nyakumangika lulume.

¹⁴Ndakhala ninga munthu okhonda tawira, thangwi ine nkhabe kwanisa kuva tayu.

¹⁵Mbwenye ndimbanyindira imwe ene, MBUYA, pontho imwe, MBUYA Mulungu wanga, munati munditawire.

¹⁶Lekani tawirisa anyamalwanga kuseka kusanyika kwanga, penu kuatawirisa kudungudza thangwi ya kutherezika kwanga.

¹⁷Ine ndili chifupi kugwa, pontho ndikuva kupha kokhonda mala.

¹⁸Ndikutawira pyakudawa pyanga; ndikuswipa mtima thangwi ya pyakudawa pyanga.

¹⁹Anyamalwanga ngakuwanga, pontho ngamphamvu; pana anthu azinji ambandizonda okhonda na thangwi ene.

²⁰Anyakubwezera chakuipa pa chadidi ambandizonda thangwi ndimbayesa kuchita pinthu pyakulungama.

²¹MBUYA, lekani kundisiya ndekha; Mulungu wanga, lekani kundikhalira kutali.

²²Ndiphedzeni chinchino pano, Mbuya, Nyankhombo wanga.