Read cisena MASALIMO 39 Bible Online

MASALIMO 39 - cisena bible

MASALIMO 39

¹Kuna nyakutchemula nyimbo. Kuna Yedutuni. Salimo ya Davite. Ine ndidalonga kuti, “Ndinati ndichite mphole-mphole na makhaliro anga, pontho ine nkhabe tawirisa lulume yanga kundichitisa kudawa; ine nkhabe dzalonga chinthu na chibodzi chene uku anthu akuipa ali chifupi tayu.”

²Ndidamatama pyanga, nee kubulusa na fala ene tayu, podi na kulonga kwene pya chinthu chadidi nkhabe! Mbwenye kusanyika kwanga ndiye kudandendeya;

³mtimanga udandipha pyakwanga. Pikhapinyerezera ine pikulu, mtimangambo ukhanyanya kugaka moto nee mbandidakwanisa tayu kukhala kwene okhonda vunza kuti:

⁴“MBUYA, ndinakhala na moyo kufikirana lini? Ndinafa lini? Ndipangeni nsiku zanga zinafuna ine dzafa.”

⁵Imwe mwandipasa Nsiku zakulengeseka zakukhala moyo! Pamaso panu nsiku za moyo wanga nee si pinthu tayu. Mphyakuona kuti munthu onsene nee ngwakupiringana muyabi,

⁶nkhabe kupiringana mthunzi tayu. Pyonsene pinaphata iye mphyakusowa basa; iye ambagumanyisa mfuma, kwache kupidziwa kuti inakhala ya ani nkhabe.

⁷Apo, Mbuya, chinadikhirira ine ninji? Ndinaikha chidikhiro changa pana imwe.

⁸Ndipulumuseni kuna umambalanga onsene; lekani tawirisa mapupwe kundiseka.

⁹Ndinamatama pyanga, nee kubulusa na fala ene tayu, thangwi ndimwe mwachitisa kuti ndione nyatwa ninga yeneyi.

¹⁰Lekani kunditchunyusa pontho! Ndili chifupi kufa na mashoko anu.

¹¹Imwe mumbalongera munthu na kumtchunyusa thangwi ya pyakudawa pyache, pontho ninga uchenje mumbavunga mfumache. Andedi, munthu nkhabe khala kupiringana muya tayu.

¹²Vani kupempha kwanga, MBUYA, pontho vani kulira kwanga; bwerani mundiphedze pinalira inepi. Ninga makolo anga onsene ine ndine mlendo wanu wakukhala kwene ndzidzi pang'ono basi.

¹³Lekani kuikha maso anu pana ine, towera nditsanzayembo pang'ono mwenemo ndidzati buluka pano, mbandikhonda dzaonekave.