Read cisena MASALIMO 4 Bible Online

MASALIMO 4 - cisena bible

MASALIMO 4

¹Kuna nyakutchemula nyimbo. Kuimbwa na anyakatangale. Salimo ya Davite. Ndiverenimbo pinapempha ine, Mulungu, nyakunditchinjiriza. Pikhali ine panyatwa, imwe mudandiphedza. Ndikomerenimbo mtima, pontho ndiverenimbo kupempha kwanga.

²Munaleka lini, imwe anthu, kunditikana? Munaleka lini kufuna pinthu pyakusowa basa na kutewera milungu yapezi?

³Kumbukani kuti MBUYA apisankhulira munthu wakulungama, tenepo MBUYA ambandiva ndingamchemera.

⁴Tetemerani na mantha mbamuleka kudawa; nyerezerani mwadidi pya penepi, pinagona imwe phee pamatalimbanu.

⁵Perekani nsembe zakuthema kuna MBUYA, pontho mnyindireni iye.

⁶Pana anthu azinji, ale ambapemphera kuti: “MBUYA, titsanzayiseni na pinthu pizinji. Cheza cha nkhope yanu chitimwinikire!”

⁷Mbwenye kukomerwa kwandipasa imwe nkhukulu pyakwanga kupiringana pyonsene pinakhala na iwo, mapira na vinyu wawo ene.

⁸Ndingagona pansi, ndimbagona chitulo na mtendere; imwe ene MBUYA, ndiye mumbandiyang'anira mwadidiletu.