Read cisena MASALIMO 40 Bible Online

MASALIMO 40 - cisena bible

MASALIMO 40

¹Kuna nyakutchemula nyimbo. Salimo ya Davite. Ndidadikhira mwakupirira kuti MBUYA andiphedze, tenepo iye adavesera mbava kulira kwanga.

²Iye adandinula m'dzenje yamitherezi; kundibulusa matope. Iye adandikhazikisa mwadidi pamwala mbandiikha pambuto yakupata.

³Iye adandifunzisa nyimbo itswa, nyimbo ya kukuza nayo Mulungu wathu. Anthu azinji anaona penepi ale anati acheuzwe napyo mbanyindira MBUYA.

⁴Ngakutsanzaya anthu ale ambanyindira MBUYA, ale ambakhonda kwatika-kwatika na anyakutumbama, penu kuphatizana nawo anyakupembedza milungu yapezi tayu.

⁵Imwe, MBUYA Mulungu wanga, mwachita pinthu pizinji; nkhabeve unango ninga imwe tayu! Pinthu pidanyerezera imwe kuti mutichitire mphikulu pyakwanga. Ine nkhabeve kwanisa kupilonga tayu; kuinjipa kwache kwanyanya maka!

⁶Imwe nkhabe funa nsembe penu pyakupereka tayu; imwe nee mumbapempha nyama kuti iotchwe paguwa yansembe tayu, penu nsembe yakubulusa pyakudawa tayu. M'mbuto mwache mwandipasa makutu kuti ndikuveni.

⁷Natenepo ndidatawira kuti, “Ndili pano, matongero anu kuna ine ali mumpukutu wanu wa mwambo.[26]

⁸Mulungu wanga, ndimbapifunadi pyakwanga kuchita pinafuna imwe. Ndimbakoya chifunziso chanu mumtima mwanga.”

⁹Pamgumano wa anthu anu, MBUYA, ndidalonga mphangwa zadidi kuti imwe mudatipulumusa. Imwe mukupidziwa kuti nee ndinaleka tayu kulonga pya penepi.

¹⁰Ine nee ndapikoyerera ndekha ene mphangwa zadidi za chipulumuso tayu; ndzidzi onsene ndimbalonga pya kukhulupirika na kutiphedza kwanu. Pamigumano ya anthu anu onsene ine nkhabe khala kwene tayu mulomo phoo, okhonda kulonga pya kutifuna kwanu kokhonda mala, pontho kukhulupirika kwanu.

¹¹MBUYA, ndikupidziwa kuti nee munalekabi kundivera nsisi. Kukhulupirika kwanu na kundifuna kwanu kokhonda mala kunanditchinjiriza ndzidzi onsene.

¹²Ine ndazungulirwa na nyatwa zizinji zokhonda lengeseka; kudawa kwanga kwandikunda mwakuti sinakwanisave kuona tayu; nsizinji kupiringana tsisi ya mumsolo mwanga, pontho ndataya mtima.

¹³Ndipulumuseni, MBUYA! MBUYA, ndiphedzeni chinchino pano!

¹⁴Anyakuyesa-yesa kufuna kundipha mbakundwe, pontho mbazunguzike monsene mwene. Anyakukomerwa thangwi ya kuona kwanga nyatwa, mbabwerere m'nduli, pontho mbachite manyadzo.

¹⁵Anthu ambalonga kuna ine mbati, “Hedewu, hedewu!” Mbanyale pontho mbalulupiswe.

¹⁶Onsene anyakudza kuna imwe mbasekere na kukomerwa. Onsene anyakupereka takhuta kuna imwe thangwi ya kuapulumusa kwanu ndzidzi onsene mbalonge mbati, “MBUYA ngwamkulu pyakwanga!”

¹⁷Mbuya, ine nkhabe mphamvu, pontho ndine wakutcherenga, kwache imwe nee mwandiduwalira tayu. Imwe ndimwe nyankhombo wanga, pontho Mulungu wanga; chimbizani dzandiphedza!