Read cisena MASALIMO 41 Bible Online

MASALIMO 41 - cisena bible

MASALIMO 41

¹Kuna nyakutchemula nyimbo. Salimo ya Davite. Ngakutsanzaya anthu, ale ambatsalakana atcherengi; MBUYA anaapulumusa pandzidzi wa nyatwa.

²MBUYA anaatchinjiriza mbakoya moyo wawo; iye anaachitisa kukomerwa m'dziko; iye nkhabe dzaapereka m'manja mwa anyamalwawo tayu.

³MBUYA anaawangisa angadwala, kuapasa pontho mphamvu zikhali na iwo kale.

⁴Ndidalonga kuti, “MBUYA, ndakudawirani; ndiverenimbo nsisi, pontho mundiwangise.”

⁵Anyamalwa ambandilongera pinthu pyakuipa. Iwo ambafuna kuti ndife, pontho ndiduwaliwe.

⁶Anthu ambadza dzandiona ale hambadza na mtima wakuona tayu iwo ambagumanyisa mphangwa zakuipa zakulonga pya ine, kubuluka penepo ambazivekesa konsene kwene.

⁷Anyakundizonda onsene ambalonga chiwere-were kuna unango na mwanzache pya ine; iwo ambanyerezera pinthu pyakuipaletu kuna[27] ine.

⁸Iwo ambalonga kuti, “Akudwala utenda wapenu-penu, pontho iye nkhabe dzalamukave pagona iyepo.”

⁹Podi mwanzanga ene ponda-pondembo, ambanyindira ine makayo, ule ambadya na ine pabodzi, andisandukira.

¹⁰Ndiverenimbo nsisi, MBUYA, na kundibwezera mphamvu zanga zakutoma zile, tenepo ndinaabwezera anyamalwanga.

¹¹Ndikupidziwa kuti imwe mumbakomerwa na ine, thangwi anyamalwanga nkhabe kundikunda tayu.

¹²Imwe munandiphedza thangwi ndimbaphata pyakulungama; munandikoya pamaso panu kwenda na kwenda.

¹³Mbakuzwe MBUYA Mulungu wa Israele! Mkuzeni iye chinchino pontho kwenda na kwenda! Ameni! Ameni!