Read cisena MASALIMO 44 Bible Online

MASALIMO 44 - cisena bible

MASALIMO 44

¹Kuna nyakutchemula nyimbo. Ndakatulo ya nkhonda Kora. Na makutu athu tapiva, Mulungu; makolo athu adatipanga pya penepi, pya pinthu pikulu pidachita imwe pandzidzi wawo pyaka pya m'ndulimu:

²pya mule mudathamangisira imwe anthu okhonda pembedza Mulungu mbamukhazikisa anthu anu m'dziko mwawomo; mule mudatchunyusira imwe anthu a madzinza anango mbamuchitisa anthu anu pinthu pyawo kuafambira mwadidi.

³Anthu anu hadapokesere dziko na matalasadawo tayu; iwo hadakunde thangwi ya mphamvu zawo tayu; zikhali mphamvu zanu na kuawangisa kwanu, pontho cheza cha nkhope yanu kuonesadi kuti imwe mumbaafuna pyakwanga.

⁴Imwe ndimwe mfumu wanga, pontho Mulungu wanga; imwe mumbapasa[29] pidzukulu pya Yakobo mphamvu zakukunda nazo,

⁵pontho na mphamvu za dzinanu, ife tinapondedza anyakutizonda.

⁶Ine nkhabe nyindira utanga penu talasadanga kuti pinandipulumusa tayu;

⁷mbwenye imwe mwatipulumusa m'manja mwa anyamalwathu mbamukunda anyakutizonda.

⁸Ife ndzidzi onsene timbanyadira imwe, Mulungu, pontho kupereka takhuta kuna imwe kwenda na kwenda.

⁹Mbwenye chinchino imwe mwatikhonda, pontho mwatilekera kuti tikundwe; imwe nkhabe tsogolera gulu yathu yankhondo tayu.

¹⁰Imwe mudatichitisa kuti tiathawe anyamalwathu, tenepo iwo adatipokosera pinthu pyathu.

¹¹Imwe mudatawirisa kuti tichekiwe ninga mabira; mudatibalalisa kumadziko achilendo.

¹²Imwe mudagulisa anthu anu na konta yakuchepa khala ninga anthu akusowa basa.[30]

¹³Atsanthembathu adaona pidatichitira imwe; iwo ambatisedegula na kuseka kwene.

¹⁴Mwatichitisa kukhala akululupa pamaso pa madzinza anango; anthu ambatipidula mbatisedegula.

¹⁵Ndzidzi onsene kwanga nkhululupiswa basi; ndagudumirwa na manyadzo

¹⁶thangwi ya kuva kunditonja na kunditikana kunandichita anyamalwanga na anyakundizondawa.

¹⁷Pyonsenepi pyatichitikira ife pano, podi kwene kuti ife nee takuduwalirani tayu penu kuswa chiverano chidachita imwe na ife nkhabe.

¹⁸Ife nee tazungunukira kwinango tayu, penu kukhonda kuvera matongero anu tayu.

¹⁹Mbwenye imwe mwatisiya kwene gwamwa pakati pa nyama zam'tsanga. Imwe mudatigudumira na mdima wakugoswa.

²⁰Mbatidaleka kupembedza Mulungu wathu mbatipemphera kuna Mulungu wachilendo,

²¹ndimomwene imwe mbamudapidziwa basi, thangwi mumbadziwa manyerezero onsene akubisika.

²²Mbwenye ndi thangwi ya imwe kuti ndzidzi onsene tikuphiwa, pontho kuti ife tikutonjwa ninga mabira akufuna kachekwa.

²³Lamukani, Mbuya! Mwatani munagona? Lamukani! Lekani kutikhonda kwenda na kwenda!

²⁴Munapibisiranji kuna ife? Lekani duwalira nyatwa na kusanyika kwathuku.

²⁵Ife tafinyizwa pansi pa fumbi; manungo athu akakamira pamataka.

²⁶Lamukani mutiphedze! Tiomboleni thangwi ya kutifuna kwanu kokhonda mala.