Read cisena MASALIMO 45 Bible Online

MASALIMO 45 - cisena bible

MASALIMO 45

¹Kuna nyakutchemula nyimbo, malingana na nyimbo ya “Maluwa a m'madzi.” Ndakatulo ya nkhonda Kora; nyimbo ya kufunana. Mafala adidi adzala mumtima mwangamu, pinapeka ine nyimbo yakuimbira mfumu. Ninga chakulembera cha nyakulemba mwadidi, lulume yanga yasasanyika kulonga ndakatulo.

²Imwe ndimwe mamuna wakubalika pyakwanga kupiringana amuna onsene; mulomo wanu umbalonga mwadidi, pontho mwakuveka. Mulungu akutsanzayisani ndzidzi onsene.

³Mangirirani talasadanu m'chuno mwanu, imwe mfumu wamphamvu; ndimwe wademelero, pontho wakugopeka.

⁴Kwirani na ukulu wanu kwenda kakunda, thangwi ya kuikhira kwanu kunduli pyakuonadi na chilungamo![31] Mphamvu zanu zinakuchitisani kukunda kukulu!

⁵Matswimo anu ngakutwa pyakwanga, ambalasiratu mitima ya anyamalwanu; madzinza ambagwa pansi pa manyalo anu.

⁶Ufumu wakupasani Mulungu[32] ngwakwenda na kwenda; mumbatonga anthu anu mwachilungamo.

⁷Imwe mumbafuna pyakulungama mbamuzondana na chakudawika. Ndi thangwi yache Mulungu, Mulungu wanu akusankhulani, pontho akukhuthulirani mtsanzayiso ukulu kusiyana na mafumu anango onsene.

⁸Mafuta akununkhira a mure na aloe ali panguwo zanu; anyaluso pa kuimba nyimbo ambadza dzakuchitisani kukomerwa m'nyumba zachifumu zakuthemeserwa na nyanga za nzowu.

⁹Ana achikazi a mafumu ali pakati pa akazi akulemedzwa, pontho kumadyo kwanu kuna nyakufuna kusembwa na imwe, wakuvala pyakuthemesera pyagolidi wadidiletu wa ku Ofiri.

¹⁰Vani kuno, imwe nyakufuna kusembwa na mfumu, nyerezerani, pontho ikhani khutu: duwalirani anthu a kwanu, pontho a m'nyumba ya babanu.

¹¹Mfumu atenuka mtima na kubalika kwanu; mulemedzeni iye, thangwi iye ndi mbuyanu.

¹²Anthu a ku Turo anati adze na mitukwa kuna imwe, amuna amfuma anayesa-yesa kuti muakomere mtima.

¹³Nyakufuna kusembwa na mfumu ali m'nyumba yachifumu; iye ngwakubalika pyakwanga, pontho nguwo zache zidachita kulukwa na golidi.

¹⁴Uku avala mkhanjo wache wakubalikawo akuendeswa kuna mfumu, m'nduli mwache muna ashamwali amwaliyo, iwombo aendeswa pontho kuna mfumuyo.

¹⁵Mwakukomerwa pontho kusekera kukulu iwo ambadza mbapitiswa m'nyumba ya mfumu.

¹⁶Imwe, mfumu wanga, munakhala na ana achimuna azinji kupita mbuto ya makolo anu kukhala mafumu; munaaikha kukhala atongi a dziko yonsene yapansi.

¹⁷Nyimbo yangayi inagalamusa kuveka kwanu kwenda na kwenda, pontho onsene anakukuzani mpakana ndzidzi onsene unadzawo.