Read cisena MASALIMO 47 Bible Online

MASALIMO 47 - cisena bible

MASALIMO 47

¹Kuna nyakutchemula nyimbo. Salimo ya nkhonda Kora. Imbani m'manja, imwe madzinza onsene, thangwi ya kukomerwa! Muimbireni mwakugaluza fala Mulungu nyimbo zakumkuza nazo.

²MBUYA Wakudzulu-dzulu athema kugopiwa; iye ndi mfumu wamkulu wakutonga dziko yonsene yapansi.

³Iye adatipasa mphamvu kuti tikunde anthu; iye adatichitisa kutonga madzinza.

⁴Iye ndiye adatisankhulira dziko inakhala ifeyi, dziko ikhanyadira pidzukulu pya Yakobo, akhafuna iye pyakwanga ule.

⁵Mulungu ambaenda kumpando wache wachifumu. Pambakhala kukhuwa thangwi ya kukomerwa, pontho kuliza ngoma pimbaenda MBUYA kudzulu.

⁶Imbani nyimbo zakukuza nazo Mulungu; imbani nyimbo zakukuza nazo mfumu wathu.

⁷Mulungu ndiye mfumu wa dziko yonsene yapansi; muimbireni masalimo akumkuza nawo!

⁸Mulungu ambakhala pampando wache wachifumu wakupambulika; iye ambatonga madzinza onsene.

⁹Mafumu a madzinza ambagumanyikana pabodzi na anthu a Mulungu wa Abrahamu. Nyamphamvu kupiringana anyankhondo onsene ndiye ene basi; iye ngwamkulu pyakwanga pene.